Merita Halili është një nga këngëtaret më të mirënjohura të muzikës popullore shqiptare. E vlerësuar si ”Mbretëresha e Muzikës Shqiptare” në Neë York, çmim i dhënë nga AAËO(Albanian American Ëomen’s Organization) Merita njihet për zërin e saj të ëmbël e të veçantë e jo vetëm. Është për t’u vlerësuar fakti, që ndonëse 53-vjeçarja ka 23 vite që është larguar nga Shqipëria, ajo promovon muzikën shqiptare në Amerikë. Merita viziton jo rrallë herë vendlindjes e saj dhe e ftuar në emisionin e Rudinës ajo zbuloi për publikun që aq shumë e do disa detaje të jetës private. Meritën e merr malli për stilin e jetesës në Shqipëri, e se si një kafe mes miqsh të lejon të “qash gjithë hallet e shtëpisë”.
“Më merr malli shumë për Tiranën, atje më mungon jeta që mund të bëja këtu, atje jemi më të kufizuar. Në Shqipëri sikur një kafe të pish, dikush të jep një ide, të ‘qan një hall’. Atje ka shumë fasadë, njerëzit nuk hyjnë në problemin tënd. Mbajnë distancë dhe janë të rezervuar.”
Merita nuk nguroi gjithashtu të ndante publikisht që fillimet kanë qenë si të gjithë shqiptarëve në emigrim, e për këngëtaren e njohur, nuk ka qenë aspak ndryshe.
“Unë kam shkuar në Amerikë përpara 23 vitesh dhe 6 muajt e parë kam ‘larë shtëpinë me lot’. Nuk po ambientohesha dot dhe aq më tepër që më erdhi në jetë edhe vajza e dytë. Isha mësuar me njerëz që më ndihmonin, atje isha vetëm. Që në fillim, kur kam shkuar në Amerikë, e kam filluar aktivitetin me muzikë dhe për vajzat kemi sakrifikuar shumë. Ndonjëherë i merrnim me vete në koncerte, derisa, më në fund, gjetëm një grua shqiptare që kujdesej për to. E pata shumë të vështirë, gjuhën nuk e dija. Në vendin ku jetoja në fillim nuk ka pasur shumë shqiptarë, mund të kemi qenë 2 ose 3 familje”, tregon këngëtarja.
