Mediat italiane kanë zbardhur detaje rreth seancës gjyqësore që u zhvillua këtë të mërkurë në Gjykatën e Katanias, ndaj “grupit “Habilaj.
“Meridionews” që ka ndjekur çështjen që në hapat e para, raporton se shefi i dyshuar i bandës, Moisi Habilaj, ka pranuar se ka pasur rolin e shefit. Ndërsa pretenca për grupin pritet të jepet në qershor.
Artikulli i” Meridionews”
“Përjashtimi i krimit shoqërues dhe dënimi minimal sipas kodit penal”. Këto shpreson të marrë avokati Maurizio Catalano si mbrojtës për klientin e tij, Nezar Seitin.
Seiti është i pandehur si arkëtari i një bande të specializuar në trafikimin e drogës nga Shqipëria në Sicili nëpërmjet detit. Seancat, të cilat tashmë kanë hyrë në aktivitet të plotë pas aktakuzës së ngritur nga ana e prokurorit Andrea Bonomo, do të zhvillohen në maj dhe qershor. Këto janë veprimet e fundit para fjalës së shkallës së parë me procedurë të shkurtuar.
Në krye të bandës, sipas prokurorëve të Etnës, është Moisi Habilaj. Habilaj ka rënë në prangat e policisë në tetor të vitit 2017 si pjesë e operacionit “Rosa dei Venti”. Ai njihet edhe në Shqipëri si kushëriri i ish-ministrit të Brendshëm, Saimir Tahiri. Me këtë të fundit dyshohet se ka bashkëpunuar për të tregtuar ndërkombëtarisht marihuana, për të cilën ish-ministri do ta ndihmonte që t’i shmangej agjensive të zbatimit të ligjit në Ballkan. Akuzat ndaj Tahirit i janë paraqitur Gjykatës që në tetor të 2018-ës, ndërkohë që ai është ende nën hetim nga Prokuroria e Krimeve të Rënda në Tiranë.
Për Nezar Seitin, prokurori Andrea Bonomo ka kërkuar një dënim prej gjashtë vjetësh. Dënim që pritet të dyfishohet për ata që fshehin Meridian Sulajn. Për këtë të fundit, avokati kërkoi përjashtimin nga hetimet dhe dënim minimal gjatë seancës dëgjimore.
Drejt lirimit është edhe Fatmir Minaj. Për akuzën dhe avokatin mbrojtës ai nuk ka kryer asnjë krim. Megjithatë fjala e fundit do t’i jepet gjyqtares Maria Cardillo.
Gjatë seancës, e cila u zhvillua me dyer të mbyllura me një pjesëmarrje të madhe të anëtarëve të familjes të të pandehurve, u diskutua edhe pozita e Antonino Riela.
Riela është akuzuar si magazinieri i drogës për të cilin prokuroria ka kërkuar 15 vjet burg. Prej pak javës, 47-vjeçari ka lënë burgun pasi ndaj tij u vendos masa “arrest shtëpie”.
Për të, mbrojtësit po punojnë për njohjen e faktorëve lehtësues dhe përjashtimin e rolit të promotorit.
Gjatë fazave të nxehta të hetimit për “Rosa dei Venti”, një atmosferë misterioze ka mbështjellë figurën e Seitit, i cili pasi u arratis nga efektivët e Guardia di Finanzia u arrestua në Shqipëri dhe më pas në fillim të vitit 2018 u ekstradua në Itali.
Ai ishte i gatshëm të bashkëpunonte me hetuesit teksa ndodhej në burgun e Rebibbias duke iu përgjigjur disa pyetjeve.
Shefi i dyshuar i trafikut të drogës, Moisi Habilaj pranoi përgjegjësitë e tij por e mohoi faktin që ishte kreu i bandës.
“Paratë ishin të fshehura në kuti detergjentesh dhe pastaj udhëtonim në Shqipëri me makinë,” tha Seiti para gjytarëve duke pranuar se paratë vinin të ardhurat nga shitja e drogës. Ai gjithashtu ka pranuar se të lidhur kanë qënë edhe Habilaj e Sulaj.
“Mu propozua që ta ndihmoja që të shkarkonte drogën”, tha i pandehuri gjatë një marrje në pyetje. Pas dëshmive të të përfshirëve para trupës gjykuese pritet edhe mbojtja që Habilaj do të bëjë.
Seanca e radhës pritet të zhvillohet më 17 maj, ndërsa pretenca pritet të jepet gjatë muajit qershor.
