Kryetari i Lëvizjes Vetëvendosje, Albin Kurti, është i vetmi lider politik që është kuruar në Qendrën Klinike Universitare të Kosovës. Madje ai nuk kishte pranuar të trajtohej në një dhomë të veçantë në Mjekimin Intensiv Qendror.
Rreth dy javë më parë, kreu i VV-së Albin Kurti u hospitalizua në Klinikën Infektive në QKUK, pasi dyshohej se ishte prekur nga virusi i rëndë. Mjekët i rekomanduan që të shtrohej në urgjencën e kësaj klinike, ku pas analizave doli se Kurti ishte i prekur nga një infeksion në mushkëri.
Mjekët e trajtuan me terapi dhe oksigjen dhe pas 24 orë qëndrimi në klinikë, Kurti u largua për trajtim të mëtejshëm në shtëpi.
Mediat raportuan se mjekët i kishin sugjeruar Kurtit që të qëndronte një natë në një dhomë të veccantë në spital, por ai nuk kishte pranuar një gjë të tillë.
Pasi doli nga spitali, lideri më i votuar në Kosovë falënderoi personelin mjekësor dhe infermierët për kujdesin ndaj tij. Në një postim të tij në rrjetet sociale, Kurti përmendi emrat e të gjithë mjekëve dhe infermierëve që u kujdesën për të, ndërsa pacientëve me të cilët kishte kaluar natën, iu dëshiroi shërim të shpejtë. Ndonëse bashkëpunëtorët e tij ishin detyruar që të blinin barin “Tamiflu” në Shkup, Kurti nuk e kritikoi ministrin e Shëndetësisë nga PDK, Uran Ismaili për mungesë të barnave.
Kurti është i vetmi lider politik në Kosovë që kërkoi mjekimin në Qendrën Klinike Universitare në Prishtinë, ndërkohë që liderë të tjerë të politikës ose i janë drejtuar klinikave private ose kanë udhëtuar jashtë Kosovës për mjekime të mëtejshme.
Kështu veproi edhe kryeministri aktual Ramush Haradinaj me familjarët e tij, të cilët i kishte dërguar për trajtim në Shqipëri.
Ndërkohë në Shqipëri vështirë se mund të gjesh një politikan, pavarësisht pozicionit të tij, që të preferojë të marrë mjekimin apo të shtrohet në spitalin publik. Madje edhe kur bëhet fjalë për analiza të thjeshta apo kontrolle rutinë, janë raportuar raste kur ato ose janë kryer në spitalet private në Tiranë, ose jashtë vendit.
