Krimet e Rënda vendosën burgim të përjetshëm për Fation Karmeshtnën, si ekzekutues i Suela Sulës, dy vite më parë.
Ai akuzohet se ka vrarë bashkëshorten e pronarit të tij Sadetin Sula, i cili ka porositur krimin.
Letra e viktimës, audio-përgjimet dhe materiali biologjik i ADN-së në thonjtë e saj ishin provat më të forta të Prokurorisë për Krime të Rënda ndaj Fation Karmeshtnës.
Ajo që më shumë ngjan si një skenar filmi, e konsideruar kështu edhe nga familjarët e një prej autorëve, bashkëshortit të viktimës, Sadetin Sulës, sipas Prokurorisë, është “skenar” i një vrasjeje brenda familjes. Referuar akuzës, ngjarja e rëndë kishte motiv dyshimet për tradhti bashkëshortore, ndërsa Karmeshtna, në rolin e ekzekutuesit, është shtyrë nga përfitimet materiale që do të merrte, shkruan Panorama.
Gjatë një hetimi, i cili është shtrirë në një kohë prej 2 vitesh, janë zbardhur dëshmi të rënda të fëmijëve të çiftit, audio-përgjime të rastësishme, letra ku Suela Sula shkruante për periudhën e keqe që po kalonte, duke pasur shpresë se një ditë çdo gjë do të zgjidhej.
Ndërkohë, ashtu si Sadetin Sula, i dënuar në Shkallë të Parë, duke u gjetur fajtor nga Gjykata për vrasjen e bashkëshortes së tij, edhe Fation Karmeshtna, e kanë mohuar autorësinë.
Karmeshtna ka thënë se ditën e ngjarjes nuk ka qenë në punë, por fillimisht në shtëpinë e tij me bashkëshorten dhe fëmijët, më pas ka dalë për të zgjidhur një punë të tijën. Por për Prokurorinë, këto pretendime mbeten në nivelin e deklaratave dhe nuk mbështeten në asnjë provë tjetër.
DYSHIMI
Sipas pretencës, motra e viktimës, shtetasja me inicialet F.M., është personi i parë që ka drejtuar gishtin e përgjegjësisë te kunati. Nga dëshmia e saj, mësohet se ditën e ngjarjes është marrë në telefon nga Sadetin Sula, i cili i ka thënë se Suela ishte keq. Pasi ka shkuar në vendin e ngjarjes, ku edhe u përball me humbjen e motrës së saj, ka dëgjuar mjeken që ka thënë se viktima ka ndërruar jetë, pasi i ka ndaluar zemra.
Për të, ky nuk mund të ishte një shkak sepse Suela nuk ka pasur asnjëherë probleme me zemrën dhe i ka kërkuar Sadetinit të shikonin kartelën. Por, sipas saj, ai nuk ka pranuar dhe kjo ka bërë që të dyshonte dhe e ka akuzuar drejtpërdrejt se ai e kishte vrarë motrën e saj.
“Ditën e ngjarjes më ka rënë telefoni, ishte Sadetini, i cili me një zë të mbytur më thotë se Suela ishte keq. Së bashku me djalin tim kemi shkuar aty, ndërsa na u tha nga infermierja se Suela vdiq, e la zemra. Dyshova, i thashë Sadetinit që le të shkojmë të shikojmë dosjen pse e kanë shënuar kështu, pasi ajo nuk ka pasur asnjëherë probleme nga zemra. Ai nuk pranoi të vinte, duke u larguar dhe unë aty kam shpërthyer dhe thashë kapeni atë se e ka bërë copë vajzën. Marrëdhënia e tyre kishte dy vite që nuk ishte e mirë. Ndërsa Sadetini ndikohej shumë nga Fationi, me ato alibitë e tij për rregullimin e problemeve me magji për të hequr djallin. Shpeshherë, ata i kanë dhënë edhe lëngje, nga të cilat është helmuar dhe ka shkuar në urgjencë”, ka thënë ndër të tjera në dëshmi, motra e Suela Sulës.
AUDIO-PËRGJIMI
Prokuroria thotë në pretencë se audiot ku dëgjohen biseda të Sadetin Sulës dhe Fation Karmeshtnës janë gjetur nga vajza e viktimës, pasi është marrë telefoni nga Prokuroria. Pasi janë konstatuar, këto audio janë dorëzuar në Gjykatë, ndërsa gjatë bisedave dëgjohet që dy bashkëbiseduesit janë shumë të afërt, pasi diskutojnë edhe problemet e familjes së Sadetinit. Në një nga bisedat dëgjohet të thuhet nga ky i fundit se më mirë e mbyste sesa të ndahej. Nga ana tjetër, dëgjohet një bisedë, ku Karmeshtna i thotë se nëse nuk bën punë magjia edhe këtë herë, ai do të kryente punën ndryshe.
Fëmijët pohojnë dhunën e ushtruar nga babai
Dëshmi para Gjykatës kanë dhënë edhe fëmijët e Suela Sulës, të cilët sipas Prokurorisë kanë konfirmuar problemet që kanë pasur prindërit, ndërsa kanë treguar edhe për momente të magjive të kryera nga Fation Karmeshtna në banesën e tyre. “Vajza e çiftit me inicialet S.S. ka dëshmuar se marrëdhëniet e prindërve nuk ishin të mira. Babai shpesh e akuzonte mamanë për marrina, gjëra që ajo nuk i bënte kurrë. Fationi ndikonte te babai duke i thënë se mami kishte marrëdhënie me persona të tjerë. Audiot i kam gjetur pasi mora telefonin e mamasë nga Prokuroria kur kam shkarkuar një këngë”, lexoi prokurori. Ndërkohë, në dëshmi, më tej fëmijët kanë treguar edhe për raste të dhunës fizike dhe psikologjike, ndërsa kanë treguar edhe për një rast, kur sipas tyre, Sadetin Sula e kishte lënë jashtë viktimën.
