Kapen rreth 1,45 tonë kokainë nga autoritetet portuare të Nju-Jorkut, një sasi rekord prej 25 vitesh, njoftuan sot autoritetet amerikane, që e shohin këtë si një shenjë të rikthimit në modë të pluhurit të bardhë.
Kjo sasi, me një vlerë prej 77 milionë dollarësh, u zbulua, më 28 shkurt, e depozituar nëpër pako brenda një kontenieri në portin e Nju-Jorkut.
“Sipas hetuesve, trafikantët kanë hapur me forcë kontenierin duke fshehur lëndën narkotike në një ngarkesë të autorizuar, që ishte nisur nga porti kolumbian i Buenaventuras”, njoftoi një burim pranë kësaj dosje.
“Kjo është kapja më e madhe e kokainës e bërë në portin e Nju Jorkut që prej vitit 1994, kur u kapën 2,7 tonë pluhur të bardhë”, deklaroi DEA, agjencia amerikane e luftës kundër lëndëve narkotike.
