Nga Boldnews.al
Kush mendon se në Shqipëri “referendumi i fundit” është ai i vitit 1994, gabon, pasi këtë na e mundësoi më së fundmi Erion Veliaj, Kryetari i Bashkisë Tiranë. Në rrjetin e tij social në Tëitter, hapi një temë shumë të rëndësishme, që ka të bëjë me “fatin” e shqiptarisë. Festimet për Ditën e Verës të mbahen me 14 Mars, apo më datë 17?… Dilemë e madhe, rëndësi kombëtare….
“Hej! Më ndihmo 1 min me një dilemë! Të gjitha parashikimet e motit e japin Ditën e Verës, dt.14 shi me gjyma! Kemi përgatitur 50 aktivitete për fëmijë e të rritur! A mos ja vlen të tregohemi të zgjuar e t’i bëjmë festimet të dielën, dt. 17? E enjtja pushim gjithsesi”, shkruan Lali Eri në Twitter.
Në këtë gjoja sondazh, u angazhuan strukturat e bashkisë dhe të administratës shtetërore që në fund, me shumicë e vendosën që data 17 këtë vit të konsiderohet si Dita e Verës. Në skamjen që ka përfshirë vendin, papunësinë, mungesën e shpresës, korrupsionin qeveritar dhe dhurimin e pasurive kombëtarë në duart e pesë oligarkëve, 14 apo 17 Marsi nuk kanë asnjë rëndësi në jetën qytetare, por për qeverinë ajo vlen shumë. Ka një shkak.
Jo pa qëllim Lali Eri e shtyu këtë datë. Më 16 mars opozita ka lajmëruar një protestë të madhe para kryeministrisë, e ngjashme me atë të 16 shkurtit, në mos edhe më masive. Për të shuar tubimin e revoltës, makineria e propagandës punon orë e cast në zyrat e bashkisë dhe kryeministrisë.
Opozita bën protestë, qeveria festë. Kjo është edhe arsyeja e vërtetë se përse Veliaj po bën xhonglime të tilla që nuk e ka problem për të ndryshuar edhe një traditë që vjen nga lashtësia. Dita e Verës tradicionalisht është më shumë një festë lokale e zonës së Elbasanit, por në 13 vitet e fundit kjo është “huazuar” edhe në Tiranë.
Si për çudi ajo korrespondon në vitin 2004, kur kryeministër ishte Fatos Nano. Më 13 mars të atij viti, opozita e asaj kohë organizoi një protestë të madhe nën moton “Nano Ik”. Fryma e përçuar, kërkonte sfumimim dhe Nano më një lëvizje të beftë një ditë më pas, 14 Marsin e shpalli “Festë Kombëtare”, që ishte vetëm një traditë e vjetër fare lokale.
Tirana u mbush me mijëra njerëz të administratës shtetërore, të qytetarëve që i gëzoheshin muzikës së servirur nga qeveria Nano dhe bashkia e drejtuar nga Edi Rama.
Më e bukura erdhi më datë 15 në gazetën “Zëri i Popullit” që si kryeredaktor kishte Erion Braçen, sot zëvendëskryeministër i Shqipërisë. “300 mijë qytetarë dalin në shesh kundër Berishës”-shkruante Braçe në gazëtën zyrtare të partisë “ZP”.
Vitet ikin, emri mund të ndryshojë nga PPSH në PS e më pas në Rilindje, por zakoni i vjetër nuk harrohet. Miting dhe kundër-miting. Këtë po bën edhe Lali Eri i bashkisë së Tiranës. Dita do afrojë dhe portalet dhe mediat pranë pushtetit, që janë të shumtë në numër po përgatiten për të shumuar revoltën qytetare dhe për të bërë që të harrohet problematika e vërtetë, kriza e madhe politike, institucionale dhe qytetare që zien prej kohësh.
Po nëse opozita u kërkon pjesëmarrësve më 16 Mars që të mos lëvizin nga sheshi, çfarë do bëhet me datë 17? Lali Eri nuk e ka problem të provokojë me muzikë, shëtitje me biçikleta, shpenzim të madh për të gërryer shpirtin e çdo të revoltuari dhe arrogancë për të ndezur zjarr.
