Nga Boldnews.al
Të gjithë deputetët e opozitës që “dogjën” mandatet rrezikojnë të marrin gjobë 1 milionë lekë të vjetra, nëse nuk plotësojnë deri në fund të javës formularin e deklarimit të pasurisë “pas largimit nga funksioni”.
Ligji “Për deklarimin e pasurive” parashikon që zyrtarët duhet të plotësojnë formularin e fundit të pasurisë brenda 15 ditëve nga largimi nga detyra. Në rast të kundërt, ligji parashikon penalitet që shkon në vlerën e 100 mijë lekëve të reja.
Zyrtarisht, të gjithë deputetët e Partisë Demokratike dhe të Lëvizjes Socialiste për Integrim që dorëzuan në mënyrë vullnetare mandatet e tyre, janë “të papunë” që prej datës 27 Shkurt 2019, ditë kur Komisioni Qendror i Zgjedhjeve (KQZ) shpalli vakancën në Parlament.
Nga kjo datë, atyre u nis llogaritja e afatit 15-ditor për dorëzimin e formularit të pasurisë “pas largimit nga funksioni”.
Periudha e dorëheqjes nga mandatet parlamentare të opozitarëve përkon me kohën kur të gjithë zyrtarët e lartë, përfshirë edhe deputetët, duhet të dorëzojnë formularët e pasurisë të përvitshëm (periodikë vjetorë). Afati për dorëzimin e deklaratave të pasurisë periodike/vjetore është 31 Marsi.
Por, për deputetët tashmë të larguar nga Parlamenti, ky afat nuk është më në fuqi. Sipas përllogaritjeve, ata duhet të dorëzojnë brenda formularin e pasurisë “pas largimit” brenda datës 14 mars 2019. Me kalimin e këtij afati, Inspektorati i Lartë i Deklarimit e Kontrollit të Pasurive dhe Konfliktit të Interesave (ILDKPKI) aplikon masat administrative gjobë për “vonesë në deklarim”.
Situata e deputetëve të dorëhequr përballë ligjit për “Deklarimin e pasurive” është edhe më e ndërlikuar. Duke iu referuar përcaktimeve ligjore, në fakt deputetët e dorëhequr duhet të plotësojnë njëkohësisht dy formularë pasurie.
Formulari i parë është ai “periodi/vjetor” për vitin 2018. Në këtë formular, ata duhet të plotësojnë të gjithë ndryshimet e pasurisë së tyre (shtesa apo pakësime) nga 1 janari deri në 31 dhjetor 2018.
Ndërsa formulari i dytë i pasurisë është ai “pas largimit nga funksioni”. Në këtë formular, deputetët e opozitës që dogjën mandatet duhet të deklarojnë ndryshimet e pasurisë së tyre nga 1 janari 2019, deri në ditën e dorëheqjes së tyre.
Pra, nëse deputetët e opozitës nuk i kanë plotësuar ende këto dy formularë pasurie, koha në dispozicionin e tyre është shumë e shkurtër.
ILDKPKI, si institucioni përgjegjës për Deklarimin e Pasurive, nuk ka bërë asnjë njoftim zyrtar për të “kujtuar” deputetët lidhur me detyrimin për dorëzimin e formularëve dhe afatet ligjore. Prej disa vitesh, ILDKPKI nuk angazhohet për të njoftuar publikisht zyrtarët, nisur nga fakti që drejtuesit e lartë të shtetit presupozohen se e njohin ligjin.
Nga ana tjetër, nuk ka informacion nëse administrata e Kuvendit i ka njoftuar deputetët e dorëhequr të opozitës edhe për detyrimin ligjor për dorëzimin e formularëve të pasurisë.
