Në një kohë kur 8 Marsi është dita ku anembanë globit, gratë protestojnë për të drejtat e tyre, kryeministri jonë bën aheng.
Kreu i qeverisë Edi Rama, ka organizuar një pritje në Fier për një audiencë të zgjedhur femrash dhe u kujdes që pamje të ceremonisë ti shpërndante për gjithë shqiptarët në faqen e tij në Facebook, nën logon e ERTV ( me gjasë të vetmit TV në mbarë botën që sipas shefit të qeverisë, nuk është kazan). Aty është aq aktiv sa ‘gojët e liga’ thonë se nuk bën gjë tjetër veçse merret me punën e Facebook-ut.
Në një moment, Rama, si pritësi i festës, fton femrat në një vallëzim kolektiv. “Gaz, gjej një muzikë për vallëzim. Jo nga ai vallëzimi grua me grua. Po për të gjitha gratë, festë dhe protestë. Futuni të gjitha këtu për vallëzim, jo për të më shqyer mua”, urdhëroi Rama. Dhe thirrjes së tij iu bashkuan shumë syresh, të cilat bashkë me kryeministrin kërcyen në këtë 8 Mars të vitit 2019. “Merreni në krahë Edi Ramën”, u dëgjua një zë femëror.
Në fund të kërcimit, Rama mes grave që kishte vendosur ti gostiste bëri shaka: “Çuditërisht jam gjallë akoma, rrofshin gratë se pa ju ne jemi kot. Gëzuar”!
E gjithë kjo skenë organizohet në të njëjtën kohë kur në disa qytete të vendit janë duke u zhvilluar protesta. Në Tiranë, gra dhe vajza protestuan te zona e Unazës së Re, banorëve të së cilës qeveria kërkon tu prishë banesat për të rikonstruktuar një rrugë me një projekt që deri më tani ka rezultuar një skandal me falsifikim dokumentesh. Protesta u zhvilluan edhe para Drejtorisë së Policisë së Tiranës, për të kujtuar gratë dhe vajzat që Policia u tregua e paaftë për ti mbrojtur nga dora vrasëse.
Protesta u zhvilluan edhe Roskovec, në Fier, në Durrës, një ditë para atyre në Korçë, sërish në Tiranë, Dibër, Fushë-Arrëz e të tjera qytete. /Boldnews.al/
