Mijëra biznese po përballen më vështirësi financiare, për shkak se qeveria thuajse ka bllokuar rimbursimin e TVSH-së.
Burime konfidenciale nga Tatimet bëjnë të ditur se në muajin shkurt, administrata tatimore rimbursoi vetëm 590 milionë lekë TVSH- për bizneset ose tre herë më pak se sa plani.
Sipas shifrave të certifikuara nga Fondi Monetar Ndërkombëtar dhe Kontrolli i Lartë shtetit, vitin e kaluar borxhet e prapambetura që qeveria ka ndaj biznesit për TVSH-në e parimbursuar arritën në 11 miliardë lekë ose 100 milionë dollarë amerikanë.
Rritja dramatike e detyrimeve të fshehta alarmoi Fondin Monetar Ndërkombëtar, që i kërkoi publikisht qeverisë t’i shlyente ato sa më parë për të mos falimentuar bizneset. Nën presionin e FMN për të shlyer menjëherë borxhet, qeveria u detyrua që në buxhetin e këtij viti të parashikojë çdo muaj 1.7 miliardë lekë rimbursim TVSH-jë për biznesin.
Por ndonëse në janar shifra u respektua, në shkurt Tatimet mësohet të kenë rimbursuar vetëm 590 milionë lekë ose tre herë më pak se plani.
Shkaku se pse administrata tatimore ka bllokuar rimbursimin e TVSH-së për biznesin është rënia e të ardhurave.
Në janar të ardhurat totale në buxhet ishin 2.5 për qind më të ulëta se vjet. Kjo tendencë negative ka vazhduar edhe në shkurt duke e zhytur qeverinë në vështirësi financiare, të cilën ajo tani po ja përcjellë biznesit duke mos i paguar borxhet.
Duke ulur në mënyrë drastike rimbursimin e TVSH-së, qeveria jo vetëm që nuk i shlyen borxhet e prapambetura nga viti i kaluar për biznesin, por është duke e rritur atë. Moskthimi i TVSH-së, vë në vështirësi serioze financiare mijëra biznese, të mund të përballen edhe me mbyllje të aktivitetit.
