Ky 8-Mars, që njihet si Dita Ndërkombëtare e Gruas, nuk i gjeti më pranë familjeve të tyre 7 gra e vajza, të cilat humbën jetën në mënyrë tragjike në vendin tonë, vetëm këtë vit.
Më 2 janar, 34-vjeçari Gazment Musta la të vdekur pas një sherri banal bashkëshorten e tij, Gentiana Caushaj dhe kunatën 18-vjeçare, Merisa Caushaj.
Vetëm pak ditë më pas, pra më 14 janar, Majlind Lala dhëndër në familjen Mata qëlloi për vdekje me armë vjehrrën e vjehrin e tij.
Ata u gjetën të vrarë në banesën e tyre në lagjen “Kristaq Mone”, ndërsa vajza e tyre mori lajmin e kobshëm në Suedi. Por, muaji shkrut, rezultoi më fatali për gratë dhe vajzat.
Më 6 shkurt, ishte radha e qytetit të Vlorës të tronditej, ku 57-vjeçari Teodor Lera i mori jetën gruas së tij, Eva Lera, 45 vjeçe, duke e mbytur me duar, ndonëse ishte nënë e tre fëmijëve.
Vetëm 6 ditë më pas, më 12 shkurt, nënë e një vajze të mitur u vra nga bashkëshorti i saj gardist. 44-vjeçari, Alket Arapaj punonjës prej 21 vitesh i Gardës së Republikës vrau me armën e shërbimit bashkëshorten e tij 36-vjeçare, Ervilma Seferi.
Ndërsa në ditën e Shën valentinit, Lirie Xhepa rreth 49 vjeçe u gjet e masakruar në liqenin e Sharrës. Policia tha se ajo ishte viktimë e kunatit të saj, Dashamir Xhepa i cili ndër të tjera e kishte qëlluar me tre plumba në trup.
Ndërkohë, vetëm 4 ditë më parë, 80-vjeçarja Nazime Demollari, mbeti viktimë nga djali i saj, Nazim Demollari, i cili për ironi të fatit mbante emrin e saj. 50-vjeçari mbyti me duar nënën e tij pas një sherri në banesë.
Gentiana e Merisa Caushaj, Valentina Mata, Eva Lera, Ervilma Seferi, Lirie Xhepa e Nazime Demollari humbën jetën nga burrat e shtëpisë, ndërkohë që secila prej tyre sot mund të jetonte, pasi krimet mund të parandaloheshin.
Fati i tyre tragjik si dhe numri në rritje i denoncimeve për dhunë ndaj grave e vajzave, mbetet një këmbanë alarmi për shoqërinë dhe institucionet.
