Është ngritur përsëri çmimi i derivateve të naftës në Kosovë. Aktualisht ky çmim është mjaft i lartë për standardin kosovar.
Çmimi i naftës dhe benzinës në Kosovë ka pasur ndryshime të shumta muajve të fundit. Çmimi më i lartë kishte shkuar në 1.23, respektivisht në 1.24 cent për një litër. Kurse, javë më parë ky çmim kishte rënë në 1.10 dhe 1.11 cent.
Në Shqipëri, nafta është akoma më e shtrenjtë, duke u luharur në 170-174 lekë, ose 1.4-1.5 euro, ose rreth 30% më e shtrenjtë se në Kosovë.
Kryetari Shoqatës së naftëtarëve të Kosovës, Fadil Berjani ka treguar se aktualisht çmimi i derivateve është 1 euro 13 cent dhe 1 euro e 14 cent.
“Çmimi për një litër naftë aktualisht është duke u shkuar me 1.13 cent. Kurse, një litër benzinë ka shkuar në 1.14 cent”.
Berjani ka theksuar se përpos këtij çmimi i cili është tani, rritje të çmimit pritet të ketë përsëri.Ai ka thënë se çmimet janë në rritje me shumicë të importit dhe pritet të ketë edhe rritje me pakicë.
“Por qytetarët janë duke u shërbyer me çmimet më të lira të derivateve në rajon përveç Maqedonisë që ka akcizën më të ulët”, ka thënë Berjani.
I njëjti ka treguar gjithashtu se ajo çfarë ka ndikuar këtë herë në ngritjen e çmimeve është pikërisht fakti se organizata prodhuese ‘Opec’ ka prodhim më të ulët.
“Sa i përket çmimit të derivateve, atë e përcakton Berza dhe organizata prodhuese OPEC. Në organizatën prodhuese Opec ka prodhim më të ulët kjo ka ndikuar që çmimet të jenë në rritje dhe në tregjet ndërkombëtare dhe ka reflektim edhe tek në Kosovë”, shtoi Berjani.
Në Kosovë ka kohë që qytetarët ankohen për çmimet e larta të derivateve ngase ato janë të larta, krahasuar me bazën ekonomike në vend.
Në bazë të disa statistikave, qytetarët e Kosovës kanë shpenzuar për 7 muaj të vitit të kaluar mbi 413 milionë litra derivate. Nëse llogaritet një litër derivate me 1.20 cent, sa ka qenë çmimi gjatë vitit 2018, rezulton që kanë shpenzuar mbi 500 milionë euro.
Prej 1 qershorit 2018 deri me 24 dhjetor 2018, qytetarët e Kosovës kanë konsumuar: Naftë – 364,580,640.18 milionë litra dhe benzinë 48,925,825.94 milionë litra.
Nafta apo ari i zi, është ndër produktet më të kërkuara dhe më fitimprurëse edhe në Kosovë.
Pasi që Kosova nuk ka rafineri të vetën, operatorët ekonomikë brenda një viti importojnë rreth 700 milionë litra të këtyre derivateve. Derivatet në Kosovë kryesisht importohen nga Serbia, Greqia dhe Bullgaria. / Monitor.al/.
