Pak ditë më parë tatimet e gjobitën moderatorin e njohur Arbër Cepanin me një shumë prej 40 milionë lekë të vjetra. Më pas i kanë bllokuar edhe llogarinë bankare.
Lajmin e ka bërë publik vetë ish banori i Big Brother, me anë të një statusi në rrjetet sociale dhe sipas pretendimeve të tij edhe llogaria bankare është mbyllur në shkelje të ligjit.
Reagimi i plotë:
Familjarë, miq, të afërm më këshillojnë të tërhiqem nga kjo betejë sepse me të drejtë, nisur nga precedentët, ky grusht njerëzish të veshur me pushtet duke abuzuar me ligjin ,shtypin me këmbë si krimbat, çdo njeri që del nga rreshtat! Por jam betuar që nuk tërhiqem nga kjo betejë sepse po u tërhoqa humbas shpresën e fundit që i kam dhenë vetes për të parë të ardhmen time në vendin tim!
Sa më shumë që kjo betejë të intesifikohet aq më shumë jam i bindur, që makineria e dhunës së disa qarqeve të caktuara të pushtetit do të intesifikohet! Prandaj betejen time e konsideroj jo vetëm betejën time, por betejën e 98% të shqiptarëve që robëtohet dhe mbijeton për të pasuruar 2% e mbetur! Jam i bindur që sa më shumë të flas, aq më shumë mund të dëgjoj për veten akuza nga më të ndyrat por përsëri nuk kam për t’u tërhequr! Sepse kjo është beteja ime e fundit!
Kjo është beteja jonë e fundit! I bëj publike shkeljet dhe abuzimet flagrante që bëhen në mënyrë selektive ndaj meje, sepse nga shteti im tashmë nuk pres më asgjë! I detyrohem transparencë Zotit dhe të gjithë qytetarëve si unë! Askujt tjetër! Shikoni shkeljen e rradhës! Shikoni inatin e rradhës! Shikoni aktin dhunues të rradhës! Shikoni shkeljen e ligjit të rradhës! Bllokim të llogarisë bankare kur ligji e thotë të zezë mbi të bardhë, që bllokimi i llogarisë bankare bëhet vetëm nëse kalon afati 30 ditor i ankimimit dhe nuk ke ankimuar ose ke ankimuar por ke marr përgjigje negative!
As afati 30 ditor nuk ka kaluar, ankimimi siç mund ta shihni në foto është bërë dhe është protokolluar dhe as përgjigje negative nuk është dhënë! Pavarsisht kësaj sërish në abuzim me ligjin, duke u sjellë mbi baza inatesh dhe duke e përdorur pushtetin si kamzhik për të nënshtruar njerërzit, ata guxojnë dhe bllokojnë llogaritë bankare!
Fali Perëndi se ju janë errësuar sytë nga arroganca e nuk dijnë më se çfarë bëjnë! Ndjesë të gjithë partnerëve dhe bashkëpuntorëve të bankave, në gjithë këto vite bashkëpunimesh nuk do e mendoja se do të vinte edhe një ditë si kjo! Boll! Boll se na e hëngrët shpirtin! Boll!
