Nga Boldnews.al
Drejtoria e Përgjithshme e Policisë së Shtetit ka vendosur që të shpenzojë në mënyrë “inteligjente” rreth 25 milionë lekë të taksave publike.
Të paktën 10 qen, që nuk janë kushërinj apo në lidhje gjaku me njëri-tjetrin, pritet t’u bashkohen forcave policore.
Brenda datës 8 Mars, Policia e Shtetit pret ofertat për blerjen e 10 qenve, të cilët duhet të përmbushin “specifikime teknike” shumë rigoroze.
Kështu, qentë duhet të jenë 4 Pastor Tedeskë, dy femra e dy meshkuj, të aftë për riprodhim, të moshës 15-24 muajsh.
Gjithashtu, kërkohen edhe tre femra, po Pastor Tedesk, të moshës 8-15 muaj. Për këtë kategori nuk kërkohet “aftësia e riprodhimit”, ndoshta për shkakun se qentë e asaj moshe nuk kanë arritur periudhën e pubertetit.
Policia e Shtetit kërkon edhe tre qen Belg Malinois (2 femra dhe një mashkull), të moshës 10-15 muaj. Nuk është e qartë se përse Policia e Shtetit nuk ka preferuar që të bëj çifte të plota edhe këtë rracë. Ndoshta fondi nuk ka qenë i mjaftueshëm dhe dy Malinois-ët meshkuj tashmë do të duhet që të trajtojnë seksualisht vetëm një femër të rracës së tyre.
Drejtoria e Policisë së Shtetit ka vendosur një seri kriteresh specifike për ofertuesit e qenve. Mesa duket, nuk është e lehtë që t’u marrësh shefave të Policisë 25 milionë lekë (të vjetra).
Sipas njoftimit të publikuar në Buletinin e Prokurorimeve Publike, qentë duhet të përmbushin një numër të konsiderueshëm kushtesh, ndër të cilët, më interesantët janë:
– Të plotësojnë karakteristikat kryesore të rracës Pastor (pesha, gjatesia, lartësia në xhidavi, veshët, bishti.etj).
– Të kenë prejardhje të njohur dhe të dokumentuar (pema gjenealogjike për 4(katër) breza dhe të ketë për çdo individë prejardhje të veçantë gjenalogjike.
– Asnjë nga qent të mos kenë lidhje gjaku ndërmjet tyre.
– Të kenë të shprehur në shkallën maksimale aportimin,
– Të kenë të shprehur në shkallën maksimale intesitetin në kërkimin në ambjente të brendëshme dhe të jashtme.
– Të kenë të shprehur në shkallën maksimale durimin në kërkim të aportit në ambjente të brendëshme dhe të jashtëme.
– Të ketë forcën e SNQ, ku mos tregojë frikë nga zhurma (krisma), dyshemeja e rreshqitëshme, lartësitë, shkallët , errësira, qitje me armë etj.
