Komisioni Qendror i Zgjedhjeve ka miratuar me 5 vota pro, po aq sa anëtarë ka në detyrë, zëvendësimin e deputetëve të LSI-së, duke plotësuar vakancën e krijuar pas dorëzimit në bllok të mandateve nga partitë e opozitës.
Kështu KQZ ka miratuar dhënien e mandatit për Edmond Rushaj, Aurora Mara, Enver Roshi dhe Ylli Shehi. Ky i fundit në formularin e dekriminalizimit ka deklaruar një vendim penal, i dënuar me 200 mijë lekë gjobë. Por ky dënim nuk e ndalon në kushtet e ligjit të dekriminalizimit për të marrë mandatin e deputetit.
Zëvendësimet
Aurora Mara ishte kandidate e LSI-së në Qarkun e Dibrës për zgjedhjet parlamentare të vitit 2017. Ajo ishte e dyta në listë pas ish-deputetit Përparim Spahiu, i cili ishte edhe udhëheqësi i Lëvizjes Socialiste për Integrim në Qarkun e Dibrës. Aurora Mara prej disa vitesh ka mbajtur detyrën e përgjegjëses së sektorit në Ministrinë e Infrastrukturës, detyrë të cilën e ka ushtruar edhe pas zgjedhjeve parlamentare të vitit 2017.
Në listën e kandidatëve të LSIsë për Qarkun e Tiranës ishin dy persona që plotësuan formularin e dekriminalizmit, duke i hapur rrugë marrjes së mandatit të deputetit. i pari ishte Ylli Shehi, i cili u zgjodh deputet për herë të parë në vitin 2013 nën siglën e Partisë Republikane të udhëhequr nga Fatmir Mediu. Por para zgjedhjeve vendore të vitit 2015, ai kaloi me LSI-në, gjë e cila krijoi besimin për ta rikandiduar edhe në zgjedhjet parlamentare të vitit 2017. Ai ishte i renditur i 8-ti në listën e LSI-së për Qarkun e Tiranës për vitin 2017 dhe tanimë pritet të bëhet deputet.
Kandidati tjetër nga LSI në Qarkun e Tiranës ishte Edmond Rrushaj, i cili ishte i pozicionuar i nënti në listën e kandidatëve të Lëvizjes Socialiste për Integrim për zgjedhjet parlamentare të vitit 2017. Edmond Rrushaj ka mbajtur më përpara detyrën e drejtorit të QSUT-së. Enver Roshi, kandidati tjetër, i cili do të marrë detyrën e deputetit nga radhët e LSI-së, ka mbajtur më parë detyrën e drejtorit të Institutit të Shëndetit Publik si edhe të dekanit në Fakultetin e Mjekësisë.
