Kreu i opozitës Lulzim Basha, i ftuar në ‘Ora news’, ka shpjeguar të gjitha arsyet se përse opozita vendosi të djegë mandatet.
Ai tha se ky ishte një vendim shumë i vështirë, por ishte alternativa e fundit që i kishte mbetur opozitës. Ndërsa shtoi se protestat qytetare tregojnë se shqiptarët janë të pakënaqur nga kjo qeveri.
‘Nuk kam braktisur as studiot dhe as gazetarët. Por siç e keni ndjekur këto kanë qenë ditë dhe javë shumë të ngarkuara, ku mediat kanë ndjekur aktivitetin tim kudo ku kam qenë. Protesta e qytetarëve është një mënyrë komunikimi e njerëzve ku shprehin pakënaqësinë, për herë të parë njerëzit janë mbledhur në protestën më të madhe për largimin e kësaj qeverie. Si protesta e 16 shkurtit ashtu dhe protestat e tjera janë shprehje e gjendjes ku ndodhet vendi. Në kuptimin e vuajtjeve të qytetarëve kjo ilustrohet me shembujt e fundit, kjo qeveri shkatërron pa ligj shtëpitë e shqiptarëve vetëm për të vjedhur 40 milionë euro, kjo qeveri nuk është produkt i votës por produkt i krimit siç është ‘Dosja 339’. Vendi ku kemi arritur është një vendim i vështirë, por arritëm pasi shteruar të gjitha opsionet e tjera. Ne jemi përpjekur të zgjidhim problemet kryesore të vendit, që janë zgjedhjet jo të lira, krimi i organizuar, qeveri e korruptuar. Ne kishim vetëm dy rrugë, kemi përballë një njeri që ka uzurpuar të gjitha institucionet dhe opozita ishte kthyer në fasadë. Pra kishim vetëm dy zgjidhje ose ti kthejmë popullit vendimmarrjen ose të bënim fasadën, ne zgjodhëm rrunë e parë’, deklaroi basha.
