Nga Boldnews.al
Anëtarja e Këshillit të Lartë të Prokurorisë (KLP), Antoneta Sevdari u shkarkua nga Kolegji i Posaçëm i Apelimit, duke shkaktuar reagime të shumta në komunitetin e juristëve dhe komentatorëve për cilësinë e vendimmarrjes së strukturës më të lartë të Vetingut.
Por, përtej komenteve, Sevdari tashmë u shkarkua me një vendim të formës së prerë dhe e vetmja rrugë që ajo mund të ndjekë është Gjykata e Strasburgut. Pas këtij zhvillimi të papritur dhe të shumë-komentuar, Këshilli i Lartë i Prokurorisë gjendet përballë sfidave të rëndësishme.
Veprimi i parë dhe formal që duhet të ndërmarrë KLP është zëvendësi i Antoneta Sevdarit. Mandati i saj pritet t’i kalojë prokurorit të Krimeve të Rënda, Dritan Prençi, i cili ka marrë më shumë vota nga kandidatët që nuk u përzgjodhën në Mbledhjen e Përgjithshme të Prokurorëve, të zhvilluar në Dhjetor 2018.
Ky është vetëm aspekti formal. Por ajo që është më e rëndësishme është fryma që tashmë po karakterizon anëtarët e tjerë të Këshillit të Lartë të Prokurorisë.
Të paktën 4 nga 5 anëtarët e mbetur nga radhët e Prokurorisë kanë llogari të hapura me ligjin dhe mandati i tyre vijon të jetë i lëkundur.
Prokurori Bujar Sheshi është nën hetim penal për “falsifikim dokumentash”, një procedurë e iniciuar nga Kryeprokurorja e Përkohshme Arta Marku pas publikimit të vendimit të Autoritetit të Dosjeve, ku konstatohej bashkëpunimi i tij me ish-Sigurimin e Shtetit.
Bujar Sheshi nuk e ka deklaruar këtë fakt në formularin e pastërtisë së figurës e, për këtë arsye, Arta Marku kërkoi nga Prokuroria e Tiranës të niste hetimin ndaj tij. Ndërkohë, vetë Sheshi e ka mohuar konstatimin e Autoritetit të Dosjeve dhe ka dorëzuar gjithashtu një kallëzim penal për drejtuesen e këtij institucioni, ku e akuzon për “shpërdorim detyre”.
Në këtë situatë akuzash-kundërakuzash, mandati i Bujar Sheshit vijon të jetë në diskutim, derisa hetimi penal të përcaktojë se nga anon e vërteta.
Gjithashtu, tre anëtarë të tjerë të KLP, të ardhura nga radhët e Prokurorisë, janë në pritje të seancave në Kolegjin e Posaçëm të Apelimit. Komisioneri Publik e, në një rast edhe Operacioni Ndërkombëtar i Monitorimit, kërkojnë shkarkimin e anëtarëve Arben Dollapaj, Gentian Osmani dhe Besnik Cani.
Këshilli i Lartë i Prokurorisë është në fazën e tij më të rëndësishme. Anëtarët e tij duhet të shqyrtojnë 27 kandidaturat për 15 anëtarë të SPAK-ut, aplikimet e të cilëve u dorëzuan pak ditë më parë.
Gjithashtu, KLP po përgatitet të hapë procedurën për kandidatët për Prokuror të Përgjithshëm me mandat të plotë. Kjo procedurë, sipas deklarimeve publike të kryetarit të KLP, Gent Ibrahimi, do të hapet në 19 Mars.
Pikërisht, në këtë moment vendimtar të veprimtarisë së KLP, Kolegji i Apelimit shkarkoi në mënyrë të dyshimtë anëtaren Antoneta Sevdari. Bazuar në vendimet e zbardhura të Komisionit të Vetingut, rezulton se problematikat e hasura në rivlerësimin e Sevdarit janë më të vogla se ato, të cilat janë konstatuar në vetingun e anëtarëve të tjerë prokurorë të Këshillit të Lartë të Prokurorisë.
