Përditësuar/ Pas Skënder Bruçajt, nga gara për kreun e KMSH-së është tërhequr edhe Islam Hoxha, myftiu i Kukësit dhe Kryetar i Këshillit të Përgjithshëm të KMSH-së.
Myslimanët zgjedhin kryetarin e ri
Myslimanët zgjedhin sot (2 mars) kryetarin e ri të komunitetit fetar më të madh në vend. Mbledhja e Këshillit të Përgjithshëm të Komunitetit Mysliman nisi në orën 10:30.
Nga gjashtë kandidatë kanë mbetur vetëm tre pas tërheqjes nga gara të kreut aktual, Skënder Bruçaj, si edhe përjashtimit të imamit të xhamisë së Golemit, Gëzim Abdishahi pasi nuk plotësonte kriteret për të qenë kandidat. Zgjedhjet do të mbahen tek Medreseja e Tiranës.
Kreu i ri do zgjidhet me votë të fshehtë të 91 anëtarëve të Këshillit të Përgjithshëm (12 anëtarët e Kryesisë së Komunitetit Mysliman, 35 myftinj si dhe anëtarë nga shoqëria civile) dhe do ketë mandat 5 vjeçar me të drejtë rizgjedhje.
Akuzat për garë false
Nga gjashtë kandidatë fillestarë, tanimë në garë kanë mbetur vetëm tre: Gramoz Blliku, Myftiu i Lushnjës; Bujar Spahiu, nënkryetar i KMSH-së dhe Ylli Gurra, Myftiu i Tiranës.
Për garën e zgjedhjes së kreut të ri të KMSH janë hedhur akuza se fituesi është paracaktuar nga qeveria.
Një ditë më parë, përmes një statusi në Facebook, ish-kryeministri Sali Berisha ka denoncuar se fituesi do të zgjidhet Ylli Gurra, të cilin e ka quajtur “vegël e Ballës dhe bosit të drogës Edmond Bego”./Boldnews.al/
