Ministri i Jashtëm në detyrë dhe benjamini i kryeministrit Edi Rama, Gent Cakaj, ishte i pranishëm në Samitin e II të Diasporës, ku dha çmimin “Diaspora dhe angazhimi publik”.
Por siç mund ta shihni edhe në videon e mëposhtme, ai kishte zgjedhur të përshëndeste me vargjet e poetit kombëtar Naim Frashëri, por u ngatërrua disa herë.
Ja fjala që mbajti Cakaj dhe “lëmshi” me vargjet e Naimit Frashërit:
“Është ndjenjë krenari e veçantë ta shohësh Diasporën shqiptare të bashkëmbledhur këtu në shqipëri, dhe për më tepër në Shqipërinë që sot vlerëson punën e çmuar që ju bëni për vendin dhe kontributin e vyer që ju jepni për botën.
Teksa pashë emrin e Naim Frashërit lart, natyrshëm më erdhën ndërmend disa nga vargjet e tij, kur nga largësia përshkruan mallin që ndiente për vendin e tij. Dhe nëse nuk gaboj, afërsisht ato janë kështu:
“Atje lind dielli i gëzuar, dhe ha… atje dielli është i gëzuar… Atje di… atje dielli është lind i gëzuar dhe hëna e buzëqeshur… (Duartrokitje në sallë për t’i larguar emocionet) Të lutem! Fat i madh e mirësi, atë vend e ka mbuluar. Atje nata është një tjetër natë dhe dita është një tjetër ditë”.
Në realitet vargjet janë:
“Atje lint diell’ i qeshur edhe hëna e gëzuar,
Fat’ i bardh’ e mirësija në atë vënt janë mbluar;
Nat’atje’shtë tjatrë natë edhe dita tjatër ditë,”
Më pas ai dha çmimin për të cilin doli në skenë.
Kujtojmë, se gjatë replikave me Presidentin Ilir Meta, pasi ky i fundit nuk dekretoi Cakajn si Ministër të Jashtëm, kryeministri Rama u shpreh se Cakaj është një ndër njerëzit më të lexuar dhe 1000 më i ditur se vetë Meta.
