Skënderbeu duket se ka hequr dorë përfundimisht nga kampionati dhe tani është përqendruar vetëm te Kupa e Shqipërisë dhe promovimi i talenteve të reja. Pas rinovimit të tejskajshëm që ky ekip pësoi në fillimsezon, u pa qartë se vëmendja do të zhvendosej tek elementi i ri. Por, në klub janë të bindur që të fokusohen te ky projekt, sidomos tani që po kalojnë edhe një krizë të thellë rezultatesh.
Është vetë Orges Shehi, i cili duket i tërhequr nga dëshira për të ndërtuar një grup të ri, që mund të bëhet edhe boshti i ardhshëm. Janë 5 futbollistë që këtë vit janë integruar nga moshat tek ekipi i madh, te të cilët drejtuesit kanë parë cilësi dhe shpresë. Pas provës së suksesshme me 18- vjeçarin Jorgo Pëllumbi, që është shndërruar në nga pikë të fortë në qendër të mbrojtjes dhe atë me Uerdi Marën në mesin e fushës, bardhekuqtë duket se po mbajnë në vëzhgim edhe tre futbollistë të tjerë. Jorgo Qeleshi, Kosta Vangjeli dhe Aldo Qoshku janë tre lojtarët që janë pjesë e Skënderbeut U-19, por që kanë dhënë sinjale të mira dhe trajneri ka vendosur t’i stërvitë vetë. Të tre këta elementë, bashkë me Marën e Pëllumbin, priten që të kenë minuta në këmbë në pjesën e mbetur të këtij kampionati.
SHEHI – Në kushtet kur diferenca me kreun është e madhe, tashmë dhe Skënderbeu nuk mund të pretendojë më që të luftojë për titullin kampion, ndaj një mundësi e mirë për të mos e çuar dëm sezonin është edhe evidentimi i talenteve. Kjo, për Orges Shehin është një punë afatgjatë që do t’i japë ekipit Skënderbeu boshtin e ri në javët e ardhshme. Vetë trajneri pranon se është bërë një punë e mirë deri më tani me ekipin e moshave, ndërsa pasardhësi i tij mund të ketë një ekip me vlera dhe me moshë të re në sezonet e ardhshme.
“E rëndësishme është që të gjejmë zgjidhjen e duhur për sezonin në vijim, pasi jemi fokusuar te ndërtimi i një ekipi të ri, me elementë mjaft të rëndësishëm për të ardhmen. Unë jam duke qëndruar afër grupmoshave të Skënderbeut dhe them se ky është një projekt që do të na japë frytet tona. Së bashku me trajnerin Kaçi mbajmë korrespondenca të vazhdueshme në lidhje me elementët që kanë talent dhe mund të japin për këtë ekip. Jam i lumtur që te këta 5 lojtarë kemi gjetur ato që na përshtaten. Është e sigurt që duke parë edhe projektin e klubit, baza do të jetë te të rinjtë këtë sezon dhe në vitet e ardhshme Skënderbeu do të ketë një bosht të ri”, u shpreh trajneri i korçarëve për gazetën në lidhje me këtë çështje. Nëse sheh ekipin bardhekuq, ajo që të bie në sy në këto momente është fakti se nga 25 lojtarë që ka në organikë, një pjesë e mirë e tyre janë nën 23 vjeç, çka do të thotë se të rinjtë janë në fokusin e Skënderbeut, sikundër e pranoi edhe trajneri.
/Panorama Sport/
