Tre emra të cilët ndodhën në listën e kandidatëve të LSI-së kanë nisur procedurën për të marrë mandatin.
Mësohet se Enver Roshi, Ylli Shehu dhe Aurora Mara kanë dorëzuar formularin e vetëdeklarimit në KQZ. Ndërkohë nga lista e PD-së janë 4 emra që nuk kanë pranuar të firmosin dokumentin e PD-së i cili ka të bëjë me dorëheqjen nga mandati.
Ato janë: Erion Piciri, Selami Jenishehri, Lefter Maliqi, Ligoraq Karamelo. Ndërkohë, përfaqësuesi ligjor i PD-se Ivi Kaso dorëzoi në KQZ listën me emrat e dorëhequr.
“Për të gjithë këta person që i përkisnin PD kemi dorëzuar dorëheqjen individuale të parevokueshme. Të gjithë kandidatët që kanë qenë pjesë e listës së PD, që kanë qenë të PD, të gjithë kanë firmosur dorëheqjen e parevokueshme. Përveç ndonjë kandidati, i cili ka qenë pjesë e partive aleate para 2017, që janë raste të njohura publikisht dhe kanë shprehur vullnetin për të mbajtur mandatin, por nuk janë persona që janë të PD, që bëjnë pjesë në koalicionin opozitar”, tha Kaso.
