Nga Boldnews.al
Për ndërkombëtarët, politika shqiptare i ngjan një grupi çunakësh në kapërcyyel të pubertitetit që kacafyten me grushta në mes të syve të publikut, për të ndarë “territorin” që mendojnë se u takon. Dikush do të ndërhyjë dhe palët lokale bëjnë tifo në distancë, për të shkuar më shumë pas të fortëve.
Si “burra të pjekur” dhe nën “petkun e të panashmëve”, përfaqësuesit e Parlamentit Europian u futën në mes në mes për të shuar trazirën, por në vend që t’i ndajnë këta “çunakë ” dhe ulin për pajtim, bëhen palë, për më shumë kundër pjesës që është më e dobët dhe merr dhunën e pushtetit.
Kjo ndodhi me qëndrimin e përfaqësuesve të Parlamentit Europian që ngritën në piedestal qeverinë, me pak sugjerime të vogla dhe “rrahën” edhe një herë opozitën. Të ngjashëm me prindërit e para viteve 90’ që edhe pse e dinin se fqinj trazovaç ua ka dhunuar fëmijën, e rrahin edhe ata vetë me kërcënimin: “mos dil nga shpia, mirë ta kanë bërë”…
“Edhe pse jemi përfaqësues të partive të ndryshme politike, ne jemi të bashkuar në mendimin tonë. Protestat para parlamentit dhe qeverisë, ne jemi absolutisht kundër që këto të kthehen nëtë dhunshme dhe jemi shumë kundër nxitjes së dhunës nga partitë politike. Nuk kemi dyshim që ky kuvend do të vazhdojë rrugëtimin, ndoshta edhe me anëtarë të rinj, por do të shikojmë, se cili do të jetë vendimi që do të merret në qershor”-thuhet në deklaratën e përbashkët të përfaqësuesve të Parlamentit Europian.
Misioni i tyre duket se është i qartë për të zëvendësuar opozitën jo më me vota, por vendime që dalin sa nga zyrat e qeverisjes aq edhe të ndërkombëtarëve. Edhe më i ashpër me opozitën ishte Knut Fleckenstein. Mjafton të lexohet deklarata e tij, pa asnjë interpretim…
“Ne e bëmë të qartë, se ne i kuptojmë argumentet e Bashës, por edhe sikur opozita të ketë tërësisht të drejtë për akuzat, bojkotimi i Kuvendit, nuk është zgjidhje e problemit dhe në fund dëshiroj të them që u befasova, u çudita shumë por edhe u zhgënjeva shumë nga kryetarja e LSI-së, pasi ajo tha vetëm një fjali, në fund të takimit, e kanë marrë vendimit që në Shqipëri ka nevojë për ndryshim pushteti për shoqërinë dhe vendin e në rast se evropianët nuk e kuptojnë ky nuk është problemi i tyre, ky është një mesazh i qartë dhe besoj se ata në Bruksel që marrin vendime dhe ata që janë në Shqipëri duhet të kuptojnë se në cilën anë gjendet secili”.
Pra, opozita mund të ketë të drejtë për blerjen e votave, por i rrahuri duhet rrahur sërish, dora i jepet më të fortit, pushtetit, për aq kohë sa palët lokale anojnë nga më të pushtetshmit, nën dhunën që shtrihet nga lart në politikë, deri poshtë ndër qytetarë.
