Nga Boldnews.al
Drejtoria e Sigurimit të Informacionit të Klasifikuar (DSIK) ka konstatuar përshtatshmërinë për vjimin e detyrës për kryegjyqtarin e Kurbinit, Alfred Gjoni, kryesisht për shkak të disa problematikave penale të ish-shoferit të tij, SH.Ç.
“Boldnews.al” ka siguruar në mënyrë ekskluzive raportin e DSIK mbi figurën e gjyqtarit Gjoni, të dorëzuar pranë Komisionit të Pavarur të Kualifikimit (KPK) më dt. 23.10.2018.
Në këtë dokument, DSIK i ka referuar KPK-së një informacion, të pashoqëruar me prova konkrete, për përfshirjen e mundshme të gjyqtarit Gjoni në një aferë korrupsioni, në bazë të të cilës i është ulur dënimi një të pandehuri.
Por ky rast, i cili duhet të kishte më shumë informacione, për të arritur në një konkluzion të drejtë, është paraqitur vetëm telegrafikisht.
Ndërkohë, DSIK është përqëndruar në pjesën më të madhe të informacionit të saj mbi të shkuarën e SH.Ç. ish-shoferi i gjyqtarit Alfred Gjoni.
Sh.Ç ka qenë i punësuar në Gjykatën e Kurbinit në vitin 2009, në pozicionin e shoferit të kryetarit Alfred Gjoni. Për disa probleme të tij, ai u shkarkua nga detyra pa mbushur asnjë vit punë.
DSIK, në raportin e saj, konstaton se “nuk evidentohen kontakte të papërtatshme, në kuptim të ligjit, me shtetasin Sh. Ç.” Por, përtej kësaj, Drejtoria e Sigurimit të Informacionit të Klasifikuar ka informuar në mënyrë të detajuar Komisionin e Vetingut për çështjet penale që ka pasur Sh.Ç, disa vite pasi ai ishte larguar nga detyra e shoferit të kryegjyqtarit.
Në raportin e DSIK, lexohen:
– Në një rast, në vitin 2015 (pra, 6 vjet pasi ai ishte larguar nga detyra e shoferit të gjykatës. Shën.Red), ndaj shtetasit Sh.Ç ka pasur një kallëzim penal për veprën penale “dëmtime të tjera me dashje;
– Në një rast, në vitin 2015, në pronën e këtij shtetasi, nga strukturat përkatëse, janë konstatuar lidhje të paligjshme të energjisë elektrike;
– Në një rast, në vitin 2008, ndaj shtetasit Sh.Ç është referuar në prokurori materiali për veprën penale të “trafikut të mjeteve motorike”, pasi automjeti i tij ka rezultuar i vjedhur
Sa më sipër, konkludon DSIK në raportin e saj, subjekti Alfred Gjoni konsiderohet “i papërshtatshëm për vijimin e detyrës së gjyqtarit.
Kryetari i Gjykatës së Kurbinit, Alfred Gjoni, u shkarkua nga detyra, pasi Komisioni i Pavarur i Kualifikimit (KPK) konstatoi problematika në mos-justifikimin e pasurisë me burime të ligjshme, siç deklaroi institucioni gjatë seancës dëgjimore.
Vendimi i shkarkimit për gjyqtarin Gjoni nuk është zbardhur ende nga KPK dhe nuk dihet nëse institucioni i rivlerësimit i ka marrë në konsideratë konstatimet e Drejtorisë së Sigurimit të Informacionit të Klasifikuar për “papërshtatshmërinë” e tij.
