Për presidentin e Skënderbeut, mungesa e policisë në stadiume në një vend anormal si Shqipëria është skandal. Ardjan Takaj thekson se me siguri private nuk mund të ofrohet siguria për askënd.
“Kampionati pa polici nuk mund të vazhdojë në një vend anormal si ky i yni. Ne vërtet jemi në Europë, por nuk është koha që policia të braktisë stadiumet, sepse nuk jemi aq europianë sa hiqemi. Mbi të gjitha, nuk kemi atë infrastrukturë për të përballuar një situatë të nxehtë si kjo tashmë.
Problemi i kampionatit nuk është fillimi, ku ka lehtësira për t’u menaxhuar. Pra, problem është fundi i sezonit. Nëse policia nuk ndërhyn në kohë, do të shkojë edhe më keq situata. Ne si klub e kemi pësuar të parët dhe e kemi paralajmëruar me kohë që do të ndodhnin histori të tilla.
Nuk mund të mbahen standarde të ndryshme, duhet të jenë të njëjta, sepse ne shkojmë në rrethe dhe kushtet nuk janë si në Korçë. Askush nuk ma garanton qetësinë në transfertë, siç ndodh me ne në Korçë. E dini ju kush i ruan arbitrat? Në rrethe askush nuk u jep siguri.
Por në këtë moment ku kampionati është nxehur, masat e sigurisë duhet të jenë të mëdha, veçanërisht për ata. Është gjynah, sepse do të ketë historira nga më të ndryshmet. Në vend që të merren masa më përpara, këtu te ne duhet të ndodhë diçka e madhe që të ketë ndërgjegjësim dhe gjërat të ndryshojnë.
Ky është skandal. Në një garë normale, të gjithë duhet të jenë të barabartë, duke plotësuar kriteret e vendosura. Nëse Skënderbeu plotëson një standard, atëherë edhe klubet e tjera duhet të kenë plus-minus të njëjtin standard. Duhet të luhet futboll në të gjitha fushat, të mos kenë frikë njerëzit të shkojnë të luajnë ndeshjet.
Skena që ndodhi së fundmi ishte në mes të Tiranës, ku tifozët u futën në fushë pa iu dredhur qerpiku fare. Në këtë situatë dëmtohen shumë edhe klubet, sepse nuk mund të dalësh zot i gjithë tifozëve.
Ka shumë të papërgjegjshëm në stadiume dhe prandaj kam insistuar që në Shqipëri nuk ishte koha të merrej ky hap kaq i nxituar. Gara sa po shkon dhe bëhet më e fortë, tani të shohim se sa do të nxehet dhe kush do ta përballojë këtë situatë”, u shpreh Takaj./PanoramaSport
