Dhoma e Përfaqësuesve e SHBA-së ka votuar një rezolutë kundër gjendjes së emergjencës kombëtare të shpallur nga presidenti Donald Trump rreth dy javë më parë në kufirin me Meksikën.
Tashmë i takon Senatit, me shumicë republikane që të votojë, teksa disa konservatorë kanë deklaruar se do t’i bashkohen Demokratëve.
Trump, i cili deklaroi gjendjen e emergjencës pasi Kuvendi refuzoi të financonte murin në kufi, tha se do të vendos veton ndaj projektligjit.
13 republikanë amerikanë iu bashkuan kolegëve të tyre demokratë duke kaluar me 245 vota pro dhe 182 kundër një dokument të përpiluar nga këta të fundit që ndalon shfrytëzimin e fondeve shtesë për ndërtimin e murit kufitar me Meksikën.
Shumica e republikanëve argumentuan se situata në kufirin me fqinjin jugor, kriza e emigrantëve të paligjshëm dhe e trafikimit të drogave apo njerëzve e justifikonte propozimin e kreut të Shtëpisë së Bardhë.
Ndërsa kryetarja demokrate e kuvendit, Nancy Pelosi, akuzoi Trump se me shpalljen e emergjencës po shkel kushtetutën dhe po ushtron një pushtet që nuk i takon.
“Nuk kemi ndër mend t’i lëmë dorë të lirë kujto presidenti demokrat apo republikan që kërkon ta bëjë copash Kushtetutën e Amerikës. Si anëtarë të Kongresit do të ishim në
shkelje të ligjit nëse nuk e hedhim poshtë propozimin e presidentit. Kjo bëhet vetëm për Kushtetutën”, tha ajo.
Por, ligjvënësit po përdorin një dispozitë nga Akti i Emergjencave Kombëtare për të anuluar vendimin e Trump, por kërkon që të dyja dhomat të votojë për të dhe procesi i votimit të përfundojë brenda 18 ditëve.
