Nga Boldnews.al
Ish-deputeti demokrat, me mandat të djegur Edi Paloka, ka një proces të hapur hetimor për akuzën e sulmit ndaj kryeministrit me solucion kimik… Ky lloj solucioni që ishte bojë stilografi, ra në fytyrën e vrazhdë të kryeqeverotarit dhe pak spërkata ia prekën edhe pamjen “engjëllore” të ministres Elisa Spiropali. Garda nxitoi ta konsideronte “solucion kimik”, pa kryer analiza, pa pritur akt-ekspertizën.
Po gazi lotsjellës i hedhur mbi qytetarëve protestues çfarë është? Dy standardet që po ndjekin institucionet shtetërore po bëjnë ndarjen e frikshme, pushtet-qytetarë.
Sasia e madhe e gazit lotsjellës helmoi për disa minuta mbrëmjen e djeshme jo vetëm protestuesit para Parlamentit, por shumë qytetarë që u gjenden nën ndikimin e lëndës kimike. Mes qytetarëve, gra e fëmijë rendnin ti shpëtonin histerisë së pushtetit, që duket se po mbahet në këmbë nga gazi lotsjellës. Gjithçka në shërbim të përfaqësuesve të mazhorancës.
Dhjetëra qytetarë mbetën për disa minuta shtrirë nëpër baret aty pranë parlamentit, me sy të skuqur, frymëmarrje të bllokuar, gulçim dhe ankth. Gjithçka u erdhi nga sytë e skuqur të përfaqësuesve të mazhorancës, që tashmë po përdorin çdo metodë kundër qytetarëve protestues të dhunshëm, thjesht pjesëmarrës, apo kalimtarë të rastit.
Kryeministri Rama ishte 120 kilometra larg zonës ku bombat me gaz lotsjellës shpërndaheshin në Tiranë si mjergull e dendur. Ai vijonte propagandën, mbështetësit e tij politik me imunitet deputeti zgërdhesheshin në Parlament, në atë godinë të hermetizuar nga çdo e “keqe” që mund të vinte nga jasht.
Deri tani organizatorët e protestës, përfaqësuesit e opozitës, kanë mundur të kenë komandë mbi turmën. Por histerizmi i strukturave të shtetit në përdorimin e tmerrshëm të lëndëve kimike mbi qytetarët, mund të kthehet në boomerang.
Pushtetit i janë errësuar sytë që nga 16 shkurti, në momentin kur protestuesit shkulën skelat përballë kryeministrisë dhe i rrëzuan kërpudhën kryeministrit. Ai ankohet se i prishën instilacionin haluçinant që personifikonte kërpudha, Lali Eri u bë bishë se protestuesit i shkelën barin dhe ndoshta prishën edhe ndonjë lule.
Këtu qeverisja nuk fal, mbi protestuesit gazi lotsjellës është pak… Pushtetit i janë skuqur sytë, bisha sulmon atëherë kur tërbohet.
