Pak ditë më parë, Albi Alla dhe Agostin Torasa u larguan nga Flamurtari duke firmosur me Janiban Funden në kampionatin kinez.
Aventura e tyre në Kinë, ka nisur në mënyrën më të keqe të mundshme duke qenë se vetëm pak ditë pasi kanë firmosur, kanë mbetur pa një skuadër dhe tashmë duhet të mendojnë për të ardhmen.
Mediat kineze raportojnë se klubi i Janibanit ka një borxh që arrin deri në 340 milionë juan ose e thënë ndryshe, 35.8 milionë dollarë.
Të gjitha këto borxhe, janë taksa që klubi nuk i ka paguar dhe tashmë diskutohet për një përjashtim nga Liga dhe madje edhe falimentim të klubit.
Në këtë mënyrë, të gjithë futbollistët e Janibanit, do të jenë pa kontratë dhe mund të largohen nga skuadra në drejtim të një skuadre të re.
Mbetet të shihet se si do ta zgjidhin këtë situatë drejtuesit e klubit, ndërkohë që Alla e Torasa do të duhet të rishikojnë dhe njëherë tjetër të ardhmen e tyre.
