Arlind Qori, akademik dhe aktivist i shoqërisë civile, ka shpërthyer në akuza ndaj kryetarit të bashkisë Tiranë Erion Veliaj.
Qori shprehet se oborri i pallatit ku jeton dhe ku ka kaluar gjithë fëmijërinë është keqadministruar dhe për këtë bën me faj bashkinë e Tiranës dhe kryebashkiakun Veliaj. Ai shton se një prej banorëve, komisioner i PS sa herë ka zgjedhje, ka zaptuar hapësirën e përbashkët duke zhvendosur aty tregun e makinave.
“Banorët e pallatit kanë trokitur disa herë në dyert e bashkisë, të policisë bashkiake, madje edhe të policisë së shtetit, duke kërkuar lirimin e oborrit dhe rregullimin e tij. Të gjitha zyrat i kanë përcjellë me përçmim. Si ka mundësi që një njeri i vetëm në shkelje të ligjit të jetë më i fortë se të gjithë banorët e tjerë? Ndoshta ngaqë sa herë ka zgjedhje është komisioner i PS, se darovit ndonjë lek apo thjesht sepse zyrtarëve të shtetit nuk u bëhet vonë për asgjë? Zgjedhjet lokale janë afër. Gaztori i vogël i bashkisë do të vijë të presë shiritin përpara kamerave të kontrolluara. Sidoqoftë, banorët e pallatit 62 do të jenë aty për t’i kërkuar llogari dhe demaskuar palo kandidatin e një palo partie që drejton një palo bashki”, shprehet akademiku përmes një shënimi në Facebook.
Statusi i Plotë
Ky është oborri i pallatit 62 në rrugën Pjetër Budi të Tiranës, rreth 100 metra pas Ambasadës së SHBA. Pallati dhe oborri i tij janë ndërtuar në vitin 1985, ka 45 apartamente të ndara në tre shkallë. Në këtë pallat kam kaluar fëmijërinë dhe pjesën më të madhe të jetës sime të rritur. Në oborrin që tani nuk ekziston më kam luajtur sa më kanë rënë këmbët e duart.
Prej javësh ky oborr jo vetëm që është rrënuar në atë pak shtrim që kishte, por edhe është zaptuar prej njërit që ka vendosur që brenda tij të zhvendosë tregun e tij të vogël të makinave. Shpëtimi – kështu quhet komshiu zaptues – deri dje kishte zënë hapësirën midis pallateve për treg makinash. Po bashkia ka vendosur ta rregullojë hapësirën midis pallateve. Mirëpo jo duke e përzënë tregun e paligjshëm të makinave, por thjesht duke e zhvendosur atë brenda oborrit tonë të përbashkët. Siç vihet re, përbindëshi prej hekuri dhe makinat e parkuara si në xhungël e kanë zhdukur pothuajse fare oborrin, ku jo vetëm që nuk mund të luajnë më fëmijët, por është bërë e vështirë edhe të kalosh.
Banorët e pallatit kanë trokitur disa herë në dyert e bashkisë, të policisë bashkiake, madje edhe të policisë së shtetit, duke kërkuar lirimin e oborrit dhe rregullimin e tij. Të gjitha zyrat i kanë përcjellë me përçmim. Si ka mundësi që një njeri i vetëm në shkelje të ligjit të jetë më i fortë se të gjithë banorët e tjerë? Ndoshta ngaqë sa herë ka zgjedhje është komisioner i PS, se darovit ndonjë lek apo thjesht sepse zyrtarëve të shtetit nuk u bëhet vonë për asgjë?
Zgjedhjet lokale janë afër. Gaztori i vogël i bashkisë do të vijë të presë shiritin përpara kamerave të kontrolluara. Sidoqoftë, banorët e pallatit 62 do të jenë aty për t’i kërkuar llogari dhe demaskuar palo kandidatin e një palo partie që drejton një palo bashki.
/Boldnews.al/
