Arabia Saudite ka njoftuar se Princesha Reema bint Bandar al-Saud është emëruar ambasadorja e mbretërisë në SHBA, duke u bërë kështu e para femër që merr një post të tillë të lartë diplomatik.
“Emërimi i saj u bë publik në një dekret mbretëror të shtunën”, raporton BBC.
Princesha Reema kaloi një pjesë të fëmijërisë së saj në Uashington DC.
Ajo merr detyrën në një kohë të vështirë, pasi Arabia Saudite po përpiqet të shuajë jehonën ndërkombëtare mbi vdekjen e gazetarit Jamal Khashoggi.
Pas dhënies së sqarimeve shpjeguese të asaj që ndodhi, Mbretëria përfundimisht pranoi se Khashoggi u vra pasi hyri në konsullatën e Arabisë Saudite në Stamboll vitin e kaluar.Por Arabia Saudite ka mohuar përfshirjen e Princit të Kurorës Mohammed Bin Salman, për të cilën komuniteti i inteligjencës amerikane ka hedhur dyshime.
Ligjvënësit në SHBA janë përpjekur të bëjnë presion mbi Shtëpinë e Bardhë për të hetuar më tej çështjen.Kohët e fundit, anëtarët e Kongresit kanë hetuar gjithashtu marrëdhëniet SHBA-Arabi Saudite në fusha të tjera, duke përfshirë teknologjinë bërthamore dhe luftën në Jemen.
Princesha Reema do të marrë rolin e vëllait të vogël të Princit të Kurorës, Princit Khalid bin Salman, i cili është emëruar si zëvendësministër i Mbrojtjes.
Edhe Princesha Reema është vajza e mbretit Salman të Arabisë Saudite.Ajo është diplomuar për Arte në Universitetin amerikan “George Uashington”.
Pas kthimit në Riad, në vitin 2005, ajo ka punuar si në sektorin shtetëror, ashtu edhe në privat, duke mbajtur postin e Drejtoreshës Ekzekutive në një rrjet të madh të shitjes së produkteve ushqimore.
Princesha Reema është e njohur në Arabinë Saudite si një mbështetëse e lëvizjeve që synojnë integrimin e femrave në shoqëri dhe aktivitete sportive në një vend që vijon të mbetet konservator.
Gjithashtu ajo ka qenë aktivisht e angazhuar në luftën kundër kancerit të gjirit tek femrat.
