Sulmuesi argjentinas, Emiliano Sala humbi jetën tragjikisht pas plagëve të marra në kokë dhe në gjoks pas rrëzimit të avionit me të cilin udhëtonte.
Këto foto të reja tregojnë avionin ku humbi jetën futbollisti. Fotot tregojnë avionin e rrëzuar në një thellësi 65 metra në shtratin e Kanalit Anglez. Autoritetet e Hetimit të Aksidenteve Ajrore kanë publikuar një raport për ngjarjen e 21 janarit.
Në raport thuhet se piloti part-time kishte bërë disa gabime bazike përpara se avioni të ngrihej në fluturim. Ekspertët thonë se avioni është ngjitur me shpejtësi lart, përpara se të binte me shpejtësi poshtë duke u shkatërruar në det.
Avioni Piper Malibu u shkatërrua nga përplasja e fortë. Trupi i mjetit fluturues u nda në tre pjesë me motorin që fluturoi nga kabina e pilotit.
Në raport thuhet se piloti David Ibbotson kishte zbritur katër herë me shpejtësi brenda 15 minutash nga një lartësi e konsiderueshme. Ai u kishte thënë kontrollorëve të trafikut ajror se kishte probleme me shikueshmërinë.
Hetimi zbuloi po ashtu se piloti part-time Ibbotson, një inxhinier gazi nga Anglia, nuk ishte i kualifikuar për të fluturuar pasagjerë me pagesë.
Hetuesit thanë se nuk e kanë zbuluar akoma shkakun e vërtetë të aksidentit, por burimet thonë se dyshohet se instrumentet e avionit kanë ngrirë. Kjo ka bërë që piloti të mos ketë lexuar mirë të dhënat për lartësinë.
Trupi i Sala u gjet në avion, kurse ai i pilotit nuk është gjendur akoma.
