Nga Boldnews.al
Këshilli i Lartë i Prokurorisë diskutoi të Premten mbi mosveprimet e Arta Markut për verifikimin e plotë të figurës së prokurorit Bujar Sheshi, kandidat dhe tashmë anëtar i KLP, për të cilin Autoriteti i Dosjeve konstatoi se ai ka qenë bashkëpunëtor i ish-Sigurimit të Shtetit.
KLP, në terma më të përmbledhur, mori në shqyrtim pasojën e ardhur nga mosveprimi i Kryeprokurores së Përkohshme, ndërkohë që nuk ka shqyrtuar shkakun e kësaj situate-pra anëtarësinë e Bujar Sheshit në këtë institucion.
Këshilli i Lartë i Prokurorisë shqyrtoi në mbledhjen e tij të fundit kërkesën e grupeve parlamentare PD-LSI për nisjen e procedimit disiplinor ndaj Arta Markut. Për deputetët opozitarë, Kryeprokurorja e Përkohshme mban përgjegjësi, për faktin se dështoi, me dashje, të kryente verifikim të plotë për kandidatin për në KLP.
“Boldnews.al” publikoi të Shtunën diskutimet e plota në KLP për kërkesën e deputetëve të opozitës lidhur me procedimin e Arta Marku, ku ra në sy mbrojtja e plotë që anëtarët e Këshillit i bën Kryeprokurores së Përkohshme.
Por, nga ana tjetër, Këshilli i Lartë i Prokurorisë nuk ka dhënë asnjë reagim. pas më shumë se një muaji nga publikimi në “Boldnews.al’, në mënyrë ekskluzive, të një dokumenti të Autoritetit të Dosjeve, ku konstatohej bashkëpunimi i hershëm i Sheshit me ish-Sigurimin e Shtetit.
Bujar Sheshi (Shesha) vijon të ushtrojë me të drejta të plota funksionet si anëtar i Këshillit të Lartë të Prokurorisë, pavarësisht se institucioni përgjegjës, Autoriteti i Dosjeve, ka konstatuar një përbën ndalim ligjor për të vijuar detyrën.
Pas publikimit të dokumentit, Bujar Sheshi reagoi duke mohuar se ka qenë bashkëpunëtor i Sigurimit të Shtetit, si edhe dorëzoi një kallëzim penal për “shpërdorim detyrë” për anëtarët e Autoritetit të Dosjeve.
Paralelisht, Kryeprokurorja e Përkohshme, Arta Marku, referoi në prokurorinë e Tiranës materialet për nisjen e hetimit ndaj Bujar Sheshit, si i dyshuar për veprën penale të “fallsifikimit të formularëve”, pasi prokurori dhe sot anëtari i KLP nuk ka deklaruar në formularin përkatës ekzistencën e bashkëpunimit me Sigurimin e Shtetit.
Pas këtyre kallëzimeve penale në seri, Këshilli i Lartë i Prokurorisë vendosi të qëndrojë inaktiv. Në një mbledhje të janarit 2019, KLP e kaloi në mënyrë tangenciale rastin “Sheshi”, duke u justifikuar vetëm me faktin që ka një hetim penal për këtë rast.
Bujar Sheshi vijon të ushtrojë detyrën, të paktën deri në përfundim të hetimeve penale, të cilat mund të duan shumë muaj për të arritur në një konkluzion. Ndërkohë, publikimi i këtij rasti vuri një pikëpyetje të madhe mbi filtrat e vlerësimit dhe emrat e “Drejtësisë së Re”, të premtuar nga Reforma e thellë, por e çoroditur e Drejtësisë.
Reforma në Drejtësi synoi, të paktën formalisht, përmirësimin e sistetim gjyqësor, nëpërmjet forcimit të integritetit të gjyqtarëve e prokurorëve.
Gjatë muajve të parë të procesit të Vetingut, një numër i lartë zyrtarësh të sistemit të drejtësisë janë shkarkuar, në bazë të motivacionit abstrakt, “cënimin e besimit të publikut’.
Ky standart, megjithëse jo shumë i qartë, siç duket, nuk aplikohet për zyrtarët e përzgjedhur në strukturat e reja, të krijuara në bazë të Reformës në Drejtësi.
