Nga Boldnews.al
Këshilli i Lartë i Prokurorisë (KLP) konkludoi se nuk është kompetent për shqyrtimin e kërkesës së grupeve parlamentare të opozitës për nisjen e procedimit disiplinor ndaj Kryeprokurores së Përkohshme, Arta Marku.
Në përfundim të mbledhjes së të Premtes, kryetari i KLP, Gent Ibrahimi, deklaroi para medias këtë konkluzion, por pa dhënë detaje se si ishte arritur në këtë përfundim.
“Boldnews.al” ka zbardhur në mënyrë ekskluzive diskutimet në mbledhjen e KLP, ku u diskutua rasti i Arta Markut. Në diskutimet e disa prej anëtarëve konstatohet pozicioni i tyre tërësisht në favor të Kryeprokurores së Përkohshme. Kërkesa e grupeve opozitare u konsiderua si një formë për të përbaltur Arta Markun.
Gjithashtu, kërkuesit, drejtuesit e grupeve parlamentare të PD-LSI konsiderohen “këta letërshkruesit”, një term që tingëllon me sens negativ.
Më poshtë gjendet diskutimi i plotë ndërmjet anëtarëve të Këshillit të Lartë të Prokurorisë:
Gent Ibrahimi (Kryetar i KLP): Pika e fundit e rendit të ditës. Kërkesa e grupeve parlamentare të opozitës për nisjen e procedimit disiplinor ndaj Prokurorit të Përgjithshëm. Kjo kërkesë lidhet me atë që konsiderohet si rasti i dështimit të Prokurorit të Përgjithshëm në trajtimin e çështjes së anëtarit të KLP, zotit Sheshi (shën. Red. Sheshi është konstatuar si bashkëpunëtor i ish-Sigurimit të Shtetit nga Autoriteti i Dosjeve). E kisha në dilemë nëse kjo kërkesë duhej futur në rendin e ditës të Këshillit, pasi dukej më shumë si letër-këmbim me natyrë administrative. Gjithësesi, e përfshiva në rendin e ditës. Por, ndërkohë dua edhe prej anëtarëve të Këshillit që të shpreheni nëse kjo çështje duhet të ishte apo jo pjesë e rendit të ditës. Pra, janë dy probleme: A duhet të bëhej kjo kërkesë pjesë e rendit të ditës dhe e dyta, dua qëndrimin tuaj mbi kërkesën.
Nurihan Seitaj: Më pyesni mua kur keni këto dilema, se mund t’ju çoj tek rruga e duhur, pasi kam intuitë penaliste. Unë nuk jam dakord as që të trajtohej kjo kërkesë. Për këtë marrë shkas vetëm nga modeli dhe lënda e një akti. Nuk shoh asnjë bazë ligjore që ne, si Këshill, të marrin në trajtim akte të tilla.
Kosta Beluri: Unë e shoh zgjidhjen si në rastet e të gjithë praktikave të tjera. Praktika, mendoj unë, duhet t’i kalonte komisionit përkatës (Komisionit Disiplinor në KLP). Ai komision duhet ta shqyrtonte dhe të jepte vlerësimin nëse kjo kërkesë duhet të kalonte apo jo në Këshill.
Alfred Balla: Ka dy momente që duhet të ndajmë: Ne duhet ta trajtojmë Prokurorin e Përgjithshëm si magjistrat, si të gjithë magjistratët e tjerë në lidhje me procedimin disiplinor, apo do të shohim shkeljet në lidhje me Kushtetutën, si pozicion i Prokurorit të Përgjithshëm
Gent Ibrahimi: Ne u gjetëm përballë konstatimit evident që Këshilli i Lartë i Prokurorisë nuk është as në rolin e iniciatorit të procedurës në rastin konkret dhe as të vendimmarrësit, pasi nuk jemi kompetentë për shqyrtimin e tij.
Nurihan Seitaj: Shkresa nuk është e firmosur nga një person i tretë, nuk ka përmbajtjen e saktë ligjore.
Gent Ibrahimi: Gjithësesi, unë mendoj që nuk duhet ta neglizhojmë një kërkesë të ardhur nga dy grupe parlamentare. Padyshim, që kërkesa do të marrë përgjigje. Por çështja është nëse do të marrë përgjigje administrative apo proceduriale.
Gentian Osmani: Për mendimin tim, kësaj çështje mund t’i jepej zgjidhje administrative, pasi Këshilli i Lartë i Prokurorisë del me akte pas seancave plenare.
Besnik Cani: Unë mbaj të njëjtën linjë me kolegët Osmani e Seitaj. Kjo çështje nuk duhet të ishte në rend dite. Është kërkesë administrative. Ne nuk mund të marrim vendim se si duhet të jetë shkresa e kryetarit, me të cilën ai do t’i drejtohet një subjekti kërkues. Pasi, nëse vendoset ky standart, i bie që çdo letër, cdo ankesë, të vij në këtë këshill, ne të marrin vendim dhe t’ia japim kryetarit per të kthyer përgjigje. E ka dhënë efektin publik kjo lloj dalje publike, kjo që dhe unë e kam parë më tepër si përbaltje. Meqë erdhi kërkesa këtu në seancë plenare, unë mendoj që Këshilli të ngarkojë kryetarin t’i kthejë përgjigje administrativisht këtyre letërshkruesve, pasi nuk është kompetentë e Këshillit të Lartë të Prokurorisë për të shqyrtuar këtë rast.
Tartar Bazaj: Çështja është nëse legjitimohemi ne për të shqyrtuar këtë kërkesë. Unë mendoj që ligjvënësit, vetë ata që dje e kanë votuar ligjin, e kanë të zgjidhur se si procedohet në këtë rast. Ne nuk kemi tagra për të shqyrtuar këtë rast. I takon kryetarin që, në mënyrë administrative, të kthej përgjigje.
Alfred Balla: Në dijeni time, di që është bërë një kallëzim penal për zonjën Marku lidhur me këtë çështje. Ndaj, mendoj, se kjo mund të ndihmoj kryetarin për të dhënë një përgjigje.
Nurihan Seitaj: Po lëri mo këto, çfarë janë këto!
Kosta Beluri: Nga një anë po themi që nuk duhet të diskutojmë në Këshill dhe ndërkohë vijojmë të hapim debate. Përgjigjen do ta gjejë Komisionin i Disiplinës i KLP. Nuk jam i mendimit që përgjigjen duhet ta kthejë kryetari. Nuk i takon kryetarit. Draftin e shkresës e bën Komisioni i Disiplinës dhe kryetari të firmosë shkresën me qëndrimin e tyre.
Besnik Cani: Idea e Belurit është në shinat e ligjit. Në rastet e tjera, ne si komision kemi dalë me akte dhe ia kemi vënë në dispozicion kryetarit. Po flas edhe për raste kur nuk është diskutuar për statura të tilla. Ky rast vjen e futet në mbledhje pa na kaluar ne fare dhe shërben vetëm për t’u bërë lajme sot gjithë ditën, e nesër, për asgjë tjetër. Unë mendoj që z. Beluri ka të drejtë. T’i propozohet kryetarit nga Komisioni i Disiplinës.
Gent Ibrahimi: Na shërben ky rast për të vendosur standartet. Ne jemi institucion i ri dhe diskutimet na ndihmojnë për të vendosur standartet. Biem dakord të gjithë që kur ka një kërkesë që kërkon nisjen e një procedure disiplinore ndaj një subjekti, ajo mund të kalojë njëherë tek komisioni përkatës dhe aty merret vendimi nëse duhet të kalojë në këshill apo përgjigja të jetë në rrugë administrative. Ju faleminderit!
