Nga Boldnews.al
Shifra të frikshme të emigrimit të mijëra minorenëve shqiptarë të pashoqëruar nga prindërit drejt vendeve të BE-së, zbulojnë situatën e rëndë në vend. “Kanë ikur dhe do të ikin, nuk jemi më në kohën e bunkerit”…, kështu e argumenton kryeministri krejt i qetë, pa asnjë breje ndërgjegje, që ikjen masive të shqiptarëve e sheh si një “zhvillim rutinë”.
UNICEF Italia dhe Ministria italiane e Punës dhe Përkrahjes Sociale raporton se: “Shqipëria është e para për numrin e minorenëve të emigruar të pa shoqëruar me prindër. 1550 fëmije emigruan në vitin 2018”. Pas vendit tonë renditen shtete të tjera kryesisht afrikane dhe të zonave të luftës.
Mjafton tu referohesh këtyre shifrave për të kuptuar situatën e rëndë në vend, veçanërisht mungesën e shpresës. Pjesa më e madhe e këtyre minorenëve kanë emigruar kryesisht drejt vendeve të BE-së, pa shoqërinë e prindërve, apo të afërmve që mund ti kenë nën kujdestari. Fati i tyre është i destinuar fillimisht të jetojnë në kampe dhe një pjesë tjetër merren nga shoqata të ndryshme, apo struktura të UNICEF.
Jeta normale e tyre është në pikëpyetje të madhe për shkak të moshës së mitur dhe gjithnjë janë preh e abuzimeve të mundshme dhe pasigurisë që vjen nga mungesa e prindërve. Shumë nga këta fëmijë largohen me lejen e prindërve të cilët shpresojnë se nëse do integrohen në vendet ku mbërrijnë e kanë më të lëhtë që të emigronjnë edhe ata. Përveç vendeve të BE-së një pjesë e minorenëve kanë preferuar të shkojnë në Angli, duke kaluar torturat e kalimit të kufirit të mbyllur në kamionë transporti.
Në çdo rast që kryeministri Edi Rama pyetet për këtë fenomen ka një përgjigje të gatshme, që më shumë se qëndrim është papërgjeshmëri. “Ky është fenomen i njohur në të gjithë botën. Ka pasur dhe do të ketë emigrim për një jetë më të mirë”-thotë Rama.
Qëllimisht kreu i qeverisë ngatërron emigrimin për çështje pune edhe mes vendeve të BE-së dhe largimin e dëshpëruar të shqiptarëve që preferojnë të mbyllen në kampe azilantësh duke mbajtur radhë për një pjatë supë sesa të qëndrojnë në Shqipëri.
Politikat e ndjekura në vend dhe situata mjaft e rëndë politike ka bërë që vendi ynë të zbrazet çdo ditë e më shumë nga rinia. Kjo e fundit është në valën e re të emigracionit dhe shifrat alarmante i përngjajnë eksodit të fillimit të viteve 90’. Atëkohë ikjet ishin kundrejt një vendi të sapo dalë nga diktatura, ndërsa aktualisht po ndihet kudo edhe frika e ngjizjes së një “neodiktature”…
