Ditën e djeshme një protestë aspak e zakontë në përmbajtje është zhvilluar në kryeqytetin e Maqedonisë së Veriut, Shkup.
Qytetarë të shumtë kanë protestuar kundër politikave të këqija shtetërore duke vendosur një palë këpucë, për çdo familjarë emigrantë që është larguar nga vendi për një jetë më të mirë.
Protesta e tyre ka tërhequr vëmendje të madhe në rrjetet sociale.
E njëjta gjë është thirrur edhe në Tiranë, dhe do të bëhet me 2 mars në sheshin ‘Nënë Tereza’.
“Duke përqafuar lëvizjen qytetare të Maqedonisë, ne, të rinjtë e vendit tonë, ftojmë çdo shqiptar të prekur nga plaga e emigrimit të bashkohen në këtë protestë simbolike.
Gjurma e një të riu që lë vendin e vet, për një jetë më të mirë, është një boshllëk i pashlyeshëm.
Bashkohemi, për çdo shqiptar që nuk mundi të flas i lirë, gjuhën e nënës.
Bashkohemi, për t’ju treguar se gjurmët e tyre, nuk harrohen.
Gjurmët e tyre, janë përpjekjet për liri dhe dinjitet.
Aktiviteti konsiston në vendosjen e një palë këpucë, si simbol për çdo të afërm që është larguar nga Shqipëria”, shkruhet në ngjarjen e krijuar në Facebook.
