Nga Boldnews.al
Pak ditë më parë, “Boldnews.al” publikoi në mënyrë ekskluzive disa raporte të Drejtorisë së Sigurimit të Informacionit të Klasifikuar (DSIK), të cilat konstatonin “papërshtatshmërinë” e gjyqtarëve dhe prokurorëve.
Një nga rastet e publikuara ishte ai i prokurorit të Prokurorisë së Përgjithshme, Artur Selmani, i shkarkuar tashmë nga Komisioni i Pavarur i Kualifikimit.
Në dokumentin sekret, DSIK konstatonte se prokurori Selmani ishte “i papërshtatshëm për vijimin e detyrës”. DSIK e mbështeste këtë konkluzion në faktin se prokurori kishte qenë nën hetim për “shpërdorim detyrë” dhe “korrupsion pasiv”.
Pavarësisht se nga hetimi penal, ai rezultoi pa probleme, DSIK mendon se “…Në këndvështrimin e përgjithshëm…çdo dyshim i arsyeshëm për kryerje apo moskryerje të veprimeve në kundërshtim me ligjin…cënojnë figurën e tij, integritetin, shkallën e besueshmërisë dhe e bëjnë këtë individ të mundshëm për t’u vënë nën presion nga strukturat kriminale..”.
Në një situatë thuajse identike ka qenë vite më parë Komisioneri i sotëm i Vetingut, Olsi Komici, dikur zyrtar në administratën publike.
Në bazë të të dhënave të publikuara në media, Olsi Komici ka qenë hetuar i hetuar për shpërdorim detyre. Madje, sipas informacioneve mediatike, ai është marrë i pandehur dhe është dërguar për gjykim nga ana e Prokurorisë.
Në përfundim të atij procesi gjyqësor, Olsi Komici është shpallur i pafajshëm nga gjykata, pavarësisht se prokuroria ka mbajtur qëndrimin se ai është fajtor për shkeljen e ligjit gjatë ushtrimit të detyrës zyrtare.
Pra, për Olsi Komicin, ka pasur dyshime të forta, madje edhe akuza konkrete për shkeljen e ligjit. Këto shkelje, sipas standartit të ndjekur nga DSIK për rastin e prokurorit Selmani, “cënojnë figurën e tij, integritetin, shkallën e besueshmërisë dhe e bëjnë këtë individ të mundshëm për t’u vënë nën presion nga strukturat kriminale…”.
Komisionerët e Vetingut, para se të merrnin detyrën, kanë kaluar në disa filtra të rëndësishëm verifikimi për pastërtinë e figurës së tyre. Është interesante të dihet se cili ka qenë konkluzioni i Drejtorisë së Sigurimit të Informacionit të Klasifikuar për emrin e Olsi Komicit.
Nëse DSIK mban të njëjtin standart, si për prokurorin Selmani e të tjerë që kanë kaluar situata të ngjashme me të, atëherë edhe komisioneri Olsi Komici, me shumë mundësi, është konsideruar “i papërshtatshëm” për ushtrimin e detyrës.
Por, komisioneri sot është në detyrë dhe ai është pjesë e vlerësimit të aftësive profesionale, pasurisë dhe integritetit të gjyqtarëve dhe prokurorëve të Republikës së Shqipërisë.
DSIK është një strukturë e inteligjencës, nën varësinë e Kryeministrit. Ky institucion është një prej strukturave ndihmëse të Komisionit të Pavarur të Kualifikimit (KPK) për realizimin e Vetingut të zyrtarëve të sistemit të drejtësisë.
