Kryeministri Edi Rama në vijim të turit të “Bashkia që duam” që është një para nxehje e shqiptarëve për fushatën e zgjedhjeve lokale të 2019-ës, ishte në Gjirokastër.
Takimi u zhvillua tek Pallati i Sportit, dhe siç pohoi vetë kryeministri, të ardhurit ishin nga Përmeti, Tepelena, Këlcyra, Gjirokastra e zonat përreth.
Siç ndodh rëndomë në katundin tonë politik, para se të vijë “I madhi” e të japë haberet për ato që ndodhin në metropol e të informojë ‘provincën’, organizohet një skenografi, rregullohet skena ku do kalojë prijësi, ku do të flaës e ku do të qëndrojnë ulur qytetarët. Ky është edhe rasti i sotëm.
Kryeministri shkoi në Gjirokastër, dëgjoi ish-ministren Mirela Kumbaro, që paralajmëroi gjirokastritët që të tregojnë veten pas 2 muajsh ( e kishte fjalën për zgjedhjet), dhe më pas mori fjalën.
Në këtë moment, në lojë hyn regjisura dhe dora artistike. Që prej momentit kur Rama mori fjalën, në largësi nga salla dëgjohet një kor që bën thirrje: Edi Rama, Edi Rama.
Nuk bëhet fjalë për një turmë njerëzish që duartrokasin, por për një efekt skenik të regjistruar, dhe në momentin kur “Dj” i duhet i bën “play”.
Flet kryeministri, çon zërin, ngre dorën, dëgjohet sërish kori: Edi Rama, Edi Rama.
Më pas, tonet zbresin, qytetarët shihen të qetë. Shumë pak duartrokasin, e më pak akoma fishkëllejnë…
Lideri është i irrituar me protestuesit që të udhëhequr nga deputeti demokrat, Tritan Shehu dhe ish-kryekomunari i Lazaratit i prenë sot rrugën kur po hynte për në qytet.
Këtu zëri duhet të çirret, për t’i treguar miletit në Tiranë se ata s’ishin qytetarë por militantë.
Flet Rama, e shoqëron edhe kori: Edi Rama, Edi Rama. Diku këtu, shihen fytyra qytetarësh të çuditur, që kthejnë kokën.
Kamera nga sipër tregon qytetarët, por nuk fikson për asnjë çast korin që bërtet me pathos: Rama, Rama.
Pas punëve me kasetë, takimeve me kasetë, socialistët duket se janë në ditë të vështira, sa edhe popullin po e ndezin me kasetë të gatshme.
Për më shumë ndiqni videon.
/Dosja.al/
