Presioni me patentat/ Shoferëve të autobuzëve u bllokohen lejet për të mos lëvizur drejt Tiranës

 

Opozita do të protestojë sot para Kuvendit, protesta e dytë radhazi kjo pas tubimit masiv të 16 shkurtit para Kryeministrisë.

Një ditë më parë deputetët e opozitës firmosën formularin për lënien e mandateve parlamentare. Prej orëve të mëngjesit, mijëra qytetarë nga rrethet janë nisur drejt Tiranës.

Mësohet se mbi 1.000 forca policie do të angazhohen në mbarëvajtjen e kësaj proteste.

Shpërndarja e uniformave blu pritet të jetë e ngjashme me protestën e së shtunës. Përballë protestuesve me një kordon që do të jetë përgjatë gjithë rrethimit të Parlamentit do të jenë punonjësit e rendit, ndërsa forcat Shqiponja dhe FNSH do të jenë në gatishmëri në bulevardin “Zhan Dark” dhe brenda rrethimit të xhamisë së Namazgjasë. Në gatishmëri pranë godinës së Parlamentit do të jenë edhe Garda e Republikës, e cila në rast se nga ana e protestuesve do të ketë tentativa për të hyrë në Parlament do të përdorë gaz lotsjellës. Në gatishmëri pranë ambienteve të Parlamentit do të jenë dhe zjarrfikëset dhe ambulancat. Kufizime për qarkullimin rrugor do të ketë tek “Xhorxh Bush” dhe pjesërisht në bulevardin “Zhan Dark”. Autobusët, ashtu si protestën e shkuar, nuk do të lejohen në qytet. Të ardhurit nga veriu do ndalojnë tek “Asllan Rusi”, kurse të ardhurit nga Jugut tek Ekonomiku.

Nga Shkodra, kryetari i PD-së, Xhevdet Amulli, tha se PD prej më shumë se dy vitesh i ka bërë apel PS me kryeministrin Rama në krye të ndërrojë kurs.

Amulli: Ka ardhur në pushtet me votat e vjedhura, po vjeç çdo ditë çdo gjë të këtij vendi. Protestat nuk do të ndalen deri në rrëzimin e kësaj qeveri. Edhe sot do të marrin pjesë protestues nga e gjithë Shqipëria nga jugu në veri.Sot do të vërshojnë nga Shkodra mbi 5 persona me autobusa dhe mjete megjithëse autobusëve u është bërë presion duke u marrë patentat shoferëve, duke u bllokuar letrat dhe duke i gjobitur. Protestën popullore nuk mund ta ndalojnë me presione sepse kjo qeveri është në grahmat e fundit.

Ndërkohë një postobllok policie është vendosur në  kufirin mes Shkodrës dhe Lezhës.

Edhe nga Lezha me dhjetëra qytetarë janë nisur me autobusë dhe mjete.

Në Berat, rreth orës 07:30 është bërë nisja e autobusëve nga selia blu. Autobusë, furgonë, por dhe mjete të vogla personale janë nisur drejt Tiranës.

Nisja e protestuesve ka nisur dhe nga Fieri. Kreu i PD-së, Luan Baçi ,deklaroi se sot është një tjetër protestë e fuqishme që vjen pas një lëvizje të fortë që bën PD.

Baçi: Protesta më masive se ajo e 16 shkurtit. Protesta e mëparshme nuk ka pasur dhunë por ka qenë një revoltë e brendshme e qytetare. PD nuk ka dhunë, protesta do të jetë masive dhe shumë  e fuqishme.

Në Korçë nisja e protestuesve ka nisur prej orës 05:30 të mëngjesit. Janë nisur nga pika te ndryshme të qytetit. Protestuesit janë nisur drejt kryeqytetit me autobusa , furgonë dhe mjete private.

PËRGJIGJU

Please enter your comment!
Please enter your name here