Nga Boldnews.al
Partitë opozitare në bllok vendosën të dorëzojnë mandatin e deputetit mes një përshtjellimi politik, fundi i së cilës mbetet ende i paqartë. Megjithë presionin e deklaratave që erdhën nga një pjesë e ndërkombëtarëve, deputetët opozitarë edhe nën mbështetjen qytetare, dorëzuan mandatet publikisht. Praktkishisht kemi një Parlament monopartik, ndonëse në letra thuhet se jemi në pluralizmi politik.
Lëvizja e befasishme e opozitës nuk ishte menduar nga kryeministri Edi Rama, i cili tashmë gjendet në afërsi të zjarrit të madh për ta mbajtur pushtetin me çdo kusht; apo për tu tërhequr dhe i hapur rrugë një qeveria kalimtare dhe zgjedhjeve të parakohshme.
Në çdo rast ngjan se Rama është i humbur, ndaj po përpiqet të luajë taktikisht, duke u nisur nga procedurat që parashikohet në rast të heqjes dorë nga mandati i deputetit. Pas djegies në bllok të mandatit të deputetit, procedurialisht do të kalohet në emrat pasardhës të listës së paraqitur për kandidatë për deputetë të opozitës.
Këtu kryeministri Edi Rama mund të tentojë një rrugë tjetër për të “blerë” politikisht disa personazhe që janë poshtë në listat e deputetëve dhe mund të tentojnë të bëhen pjesë e Parlamentit. Ligjërisht ata kanë të drejtë të marrin mandatin, pavarësisht vendimit politik të partisë dhe strukturave të saj, pasi marrja e mandatit, apo refuzimi i tij konsiderohet e drejtë individuale dhe është në vullnetin e tij se çfarë duhet të bëjë.
Ndoshta këtyre firove mund ti druhet edhe kryetarja e LSI-së Monika Kryemadhi, që nën emocione lëshoi një deklaratë të fortë se kushdo që del mbi vendimin unanim të strukturave drejtuese të partisë dhe pranon mandatin e deputetit, do të përfundojë në kazanët e plehrave.
Në rast se një pjesë e personave që janë në listën e deputetëve pranojnë të marrin mandatet, atëherë mund të ketë një konfigurim tjetër në Parlament, që sa për imazh mund të konsiderohet “pluralist”, ndërsa praktikisht nuk mund të ketë asnjë lidhje me opozitarizmin.
Nëse Ramës do i duhet që për të fituar kohë në pushtet prania e deputetëve të listës së poshtme të opozitës, mund të nisë turi i joshjes dhe blerjeve. Gjithçka për sezonin e ri “pranverë-verë” 2019.
