Nga Boldnews.al
Një rast i paprecedent është shënuar nga Autoriteti i Komunikimeve Elektronike dhe Postare me ndërprerjen e linjave të komunikimit të operatorëve celularë në zonën pranë Parlamentit, Kryeministrisë dhe Kryesisë së Kuvendit. Shkëputja është bërë me kërkesë të Policisë së Shtetit. Gjithçka ka nisur për shkak të protestës së opozitës dhe institucionet e vendit kanë vendosur të bllokojnë komunikimin e telefonisë lëvizëse, duke marrë hapin e parë për të shkëputur çdo lidhje.
Më shumë se një masë rutinë, apo frikë për ndonjë trazirë të mundshme, janë akte që zakonisht merren në nisje të luftimeve. “Autoriteti i Komunikimeve Elektronike dhe Postare njofton qytetaret se me kërkesën e Drejtorisë së Përgjithshme të Policisë së Shtetit, me qëllim marrjen të masave për zbatimin e detyrimeve që kanë të bëjnë me mbrojtjen e interesave të vendit dhe të sigurisë publike, ka udhëzuar operatorët celulare të bëjnë ndërpreje të shërbimeve të komunikimeve elektronike në disa zona të Tiranës, nga ora 11.00 deri në orën 16.00 të datës 21 shkurt 2019”-thuhet në njoftim.
Në protokollin ushtarak, veprimi i parë që kryhet para një beteje, është ndërprerja e ndërlidhjes së kampit armik. Kjo masë njihet si “izolim i armikut” për të mos i lënë mundësi të ketë kontakt për furnizim me bazën ushtarake dhe t’i shkëputet komunikimi për veprime luftarake.
Mos jemi një hap para luftës? Protestuesit ishin mëse të qetë, edhe pse në një numër shumë të madh lëvizën nga sheshi para Parlamentit, deri në Kryesinë e Kuvendit, ku deputetët e opozitës dorëzuan mandatet. Për qytetarët e Tiranës kjo masë shkaktoi terror duke mos kuptuar çfarë po ndodhte dhe alarmimi niste nga prindër me fëmijë në shkolla dhe çerdhe, deri në ndalimin për të marrë shërbimet e nevojshme, qofshin ata edhe për linjat e emergjencës.
Edhe pse kërkesa ka ardhur nga Policia e Shtetit, urdhi mendohet të ketë frymëzimin nga shumë lart, që të çojnë në zyrat e kryeministrisë. Më shumë se një masë për të mos lejuar qytetarët të organizohen, ishte një akt për të ndërprerë lidhjen direkte të televizioneve, veçanërisht atë ndërkombëtare të cilët, si rrallherë po i transmetonin live zhvillimet në Shqipëri.
Ramës i intereson izolimi dhe mosinformimi i asaj që po ndodh, duke marrë shembull nga i përngjashmi, Presidenti i Turqisë Rexhep Taip Erdogan, që tre vjet më parë për shkak të protestave të shumta urdhëroi shkëputjen e linjave të komunikimit me rrjetet sociale.
