Kriza politike në Shqipëri ka tërhequr vëmendjen e mediave ndërkombëtare, veçanërisht atyre italiane.
Nga protesta e 16 shkurtit dhe në ditët në vijim, mediat në vendin fqinj kanë publikuar zhvillimet në Shqipëri, përfshi këtu edhe dorëzimin e mandateve nga deputetët e opozitës.
Laura Tangherlini ka raportuar për RAI, televizionin publik në Itali, mbi zhvillimet në Tiranë, ndërsa ka paralajmëruar se shumë shpejt pritet një deklaratë zyrtare e BE-së lidhur me këto zhvillime.
Në deklaratën që pritet të bëhet publike së shpejti, kërkohet që të hapet dialogu mes palëve, por edhe qëndrimi kundër bojkotit të opozitës.
Dhe nëse nuk do të ketë zgjidhje, përfaqësues të lartë të BE-së pritet të mbërrijnë së shpejti në Tiranë.
Prej dy ditësh, ambasadorët e akredituar në Tiranë kanë nisur lëvizjet, kontaktet dhe përveç deklarimeve zyrtare, duket se po punojnë për gjetjen e një zgjidhjeje politike mes palëve.
Opozita kërkon një qeveri tranzitore që do të mundësojë zgjedhje të lira dhe të ndershme, ndërsa deri më tani mazhoranca, përfshi edhe kryeministrin Rama, janë deklaruar kundër kësaj ideje.
