Tre shqiptarë janë vënë në pranga në Itali si anëtarë të një bande kriminale që grabisnin vila e banesa në zonën e Italisë veriore, në rajonet e Lombardisë, Venetos, Friulit, Venezia-s e Giulias.
Siç raportojnë sot mediat italiane, hetime e kryera nga Policia e Pordenones në bashkëpunim me atë të Milanos dhe Trevizos kanë zbardhur mbi 33 grabitje të kryera nga shqiptarët në periudhën e prag festave të fundvitit 2018, kryesisht në provincën e Pordenones dhe të Trevizos.
Përllogaritet se vlera e objekteve, bizhuterive, parave cash e shufrave prej floriri të vjedhura kanë kapërcyer vlerën e 1 milionë euro.
Policia italiane ka zbardhur gjithashtu se mjaft prej objekteve dhe parave të grabitura ricikloheshin apo investoheshin në Shqipëri.
Gjatë operacionit janë sekuestruar dhe armë zjarri e municione të përdorura gjatë grabitjeve.
