Ish-mesfushori i Skënderbeut, Sabjen Lilaj është duke kaluar një sezon të mirë me Gabalën në Azerbajxhan ku është një titullar i padiskutueshëm në ekipin e tij dhe si objektiv kanë një vend për në kupat e europës dhe fitimin e Kupës.
Në një intervistë për Telesport ai ka komentuar dhe ecurinë e ish-ekipit të tij Skënderbeut, borxhet me klubin dhe luftën për titullin në Shqipëri. Ai tha se nuk e priste këtë rënie kaq të madhe të Skënderbeut, por ka kohë akoma të ringrihen sërish.
Skënderbeu: “Nuk është se e kam ndjekur shumë kampionatin shqiptar por jam në dijeni të rezultateve. Për Skënderbeun më vjen keq që ka filluar këtë lloj rënie. E prisja, madje isha i surprizuar nga rezultatet e dy fazave të para. Por nuk e prisja një rënie kaq të madhe, gjashtë ndeshje pa fatiore, u rikthyen te fitorja, tani sërish humbje. Kanë shumë oshilacione, nuk e di arsyen e kësaj rënie. Por besoj se ka kohë akoma të ringrihen sërish. Kanë lojtarë të rinj, pavarësisht se nuk kanë shumë eksperiencë, besoj se janë të talentuar.”
Borxhet me klubin: “Me klubin kam arritur një marrëveshje, kam marr një pjesë të pagesave, kam dhe një pjesë për të marr. E kemi zgjidhur si problem kështu që gjithçka është në rregull.”
Lufta për titullin kampion: “Besoj që Partizani është favorit, 6-7 pikë është një difernecë e madhe, por që ka kohë akoma. Shoh një Durrës shumë simpatik, Kukësi vazhdon me probleme, kështu që Partizani është favorit për këtë sezon.”
