Aleatët e Partisë Demokratike kanë mbështetur vendimin e grupit parlamentar demokrat për djegien e mandateve. Kreu i PD-së, Lulzim Basha, ka zhvilluar një takim me kryetarë të partive aleate, të cilët kanë mbështetur këtë vendim.
Kreu i PR-së, Fatmir Mediu, duke shprehur mbështetjen për vendimin e djegies së mandateve, theksoi se ne kemi një koalicion të hershëm me njëri-tjetrin, dhe kemi detyrim moral ndaj atyre që na kanë votuar që Edi Rama nuk mund të qeverisë.
“Ne sot kemi marrë vendimin që të djegim mandatet, jo vetëm deputetët që janë në parlament, por të gjithë emrat që kanë kandiduar për opozitën”, tha Mediu.
Kreu i PBDNJ-së, Vangjel Dule, e cilësoi si mjaft të rëndësishëm këtë moment, duke shtuar se është një mission i vështirë, i rëndë, që kërkon mbështetjen e të gjithë mbështetësve të opozitës, por edhe atyre që janë të gënjyer nga Rilindja dhe Edi Rama. Sipas Dules, misioni i opozitës nuk përfundon me djegien e mandateve të saj, pasi misioni i saj është krijimi i kushteve për zgjedhje të lira dhe të ndershme.
Kreu i PDK-së, Nard Ndoka, në reagimin e tij, tha ky duhet të jetë momenti i reflektimit nga ana e Ramës jo vetëm për djegien e mandatit si deputet, por edhe si Kryeministër. Sipas Ndokës, Rama duhet të reflektojë pasi është kapur duke vjedhur zgjedhjet
Dashamir Shehi theksoi se sa kohë të jetë Rama Kryeministër, ne si opozitë do të jemi bashkë.
“Është vendimi i duhur në këtë moment. Përsa kohë Edi Rama do të jetë Kryeministër, ne do të jemi bashkë”, tha Shehi.
