Skandal/ Policia kujtohet që shkeli ligjin, liron 80 vjeçarin që vallëzoi mbi Kryeministri

Mbrëmjen e sotme rreth orës 19:00, Policia e Shtetit arrestoi një 80-vjeçar në Lezhë për protestën e dhunshme dje para Kryeministrisë.

Ai është Ndue Fuga nga Fishta e Lezhës, i cili pasi u mor në banesën e tij u transportua për në Drejtorinë e Policisë së Tiranës.

Një veprim i policisë, të cilin e ndalon rreptësisht Kodi i Procedurës Penale.

Neni 230, pika 2 thekson: “Nuk mund të vendoset arresti në burg ndaj një gruaje që është shtatzënë ose me fëmijë nën moshën 3 vjeç dhe që jeton me të, ndaj një personi që ndodhet në gjendje shëndetësore veçanërisht të rëndë ose që ka kaluar moshën shtatëdhjetë vjeç ose një personi toksikoman apo të alkoolizuar, për të cilin zbatohet një program terapeutik në një institucion të posaçëm”.

Por pas publikimit të lajmit dhe zhurmës që shkaktoi në opinionin publik, Policia e liroi rreth orës 21:30 me pretendimin se“do të hetohet në gjendje të lirë për shkak të moshës dhe gjendjes shëndetësore.

80-vjeçari akuzohet për “Kundërshtim të punonjësit të policisë së rendit publik”, “Goditje për shkak të detyrës”, “Shkatërrimi i pronës” dhe “Prishja e qetësisë publike”. Ai u pa gjatë protestës së djeshme duke hipur mbi strehën ndriçuese të kryeministrisë ku edhe valëviste flamurin kombëtar.

Një tjetër gafë e rëndë e Policisë së Shtetit pas rastit të djeshëm gjatë protestës ku protestuesit u sulmuan me gaz helmues.

Nuk e dimë ende nëse për të tilla shkelje ligjore do të ketë të ndëshkuar apo jo?…

Ja çfarë thotë për këtë rast Kodi i Procedurës Penale i Republikës së Shqipërisë

Neni 230/

Kriteret e veçanta për caktimin e masës së arrestit në burg (Ndryshuar fjalë në pikën 2 me ligjin nr. 35/2017, datë 30.3.2017)

1. Arresti në burg mund të vendoset vetëm kur çdo masë tjetër është e papërshtatshme për shkak të rrezikshmërisë së veçantë të veprës dhe të pandehurit.
2. Nuk mund të vendoset arresti në burg ndaj një gruaje që është shtatzënë ose me fëmijë nën moshën 3 vjeç dhe që jeton me të, ndaj një personi që ndodhet në gjendje shëndetësore veçanërisht të rëndë ose që ka kaluar moshën shtatëdhjetë vjeç ose një personi toksikoman apo të alkoolizuar, për të cilin zbatohet një program terapeutik në një institucion të posaçëm.
3. Në rastet e parashikuara në pikën 2 arresti në burg mund të vendoset vetëm kur ka shkaqe të një rëndësie të veçantë për krimet që dënohen jo më pak në maksimum se dhjetë vjet burgim.
4. Të miturit nuk mund të arrestohen kur akuzohen për kundërvajtje penale.