Trajneri bardhekuq Orges Shehi ka folur në prag të ndeshjes ndaj Flamurtarit ku ka theksuar se të besuarit e tij shkojnë në këtë takim për maksimumin.
Shehi, veç fitores takimi me Laçin iu dha edhe dy përgjigje pozitive. Sa të rëndësishme janë “eksperimentet” e fundit në formacion?
Mund të them se jemi të lumtur dyfish, së pari që jemi rikthyer në fitorja pas disa javësh mungesë dhe më pas për fitimin e dy lojtarëve të rëndësishëm që vijnë nga radhët e të rinjve. Unë personalisht kam shumë qejf lojtarët e rinj dhe për këtë arsye vendosa ti jap mundësinë si Dajsinanit ashtu edhe Pëllumbit që të tregonin vlerat e tyre dhe këtë gjë e bënë më së miri. Jam i kënaqur me atë që treguan dhe mbi të gjitha me faktin se ekipit i shtohen dy elementë me vlera për të ardhmen.
Nëse për Dajsinanin i dhe arsyet e aktivizimit, pse vendose ti besosh Pëllumbit në një pozicion që ai nuk e kishte praktikuar?
Pëllumbi për mua është një mbrojtës i krahut të majtë dhe duke e parë në stërvitje krijova idenë se mund të luajë edhe ne qendër me lehtësi. Është një lojtar i fituar pasi na duhen lojtarë të tillë që të luajnë në dy pozicione. Mund të them se kemi bërë një investim të rëndësishëm për të ardhmen pasi të dy këta lojtarë mund të bëhen pjesë e boshtit të Skënderbeut në vijimësi.
Kjo do të thotë se do ti besoni sërish në ndeshjen e Vlorës?
Ju doni të zbuloni pak e nga pak formacionin por nuk mund të them asgjë pasi nuk e kam vendosur ende. Mund të them që janë dy lojtarë mjaft të rëndësishëm dhe që ndjehem krenar që i kam zbuluar në një kohë ku Skënderbeu ka prioritet të risë të tillë talente me qëllim që të mbajnë peshën e ekipin pas disa viteve.
Si shkon ekipi në ndeshjen ndaj Flamurtarit?
Mund të them se jemi më të plotë se ndeshjet e tjera. Pasi përveç rezultateve jo të mira kemi pasur edhe shumë mungesa për arsye të ndryshme në ekip. Në këtë takim vijmë më të plotë veç mungesës së lojtarëve që janë të dëmtuar për një kohë të gjatë.
Sa i beson Shehi krizës së Flamurtarit?
Nuk është se i besoj faktit që Flamurtari është në Krizë. Është një ekip që luan futboll të bukur dhe ka cilësi në ekip. Për këtë arsye ne duhet të jemi të kujdesshëm dhe të kërkojmë të marrim maksimumin në këtë ndeshje. Duhet të kemi vijimësi dhe për të bërë një gjë të tillë duhet të luajmë në të njëjtën mënyrë dhe ego siç bëmë ndaj Laçit.
Në Vlorë vitet e fundit Skënderbeu ka marrë rezultatet ndryshe nga herët e tjera…
Statistikave nuk është se i besoj shumë, por mund të them se ndeshja me Flamurtarin është një derbi në vetvete dhe të tilla takime nuk kanë pretendentë. Plus kësaj në Vlorë është një fushë që mund të luash mirë për shkak të terrenit. Kjo i ndihmon të dy ekipet të tregojnë cilësitë e tyre në fushë.
