Nga Boldnews.al
Komisioni për Mbrojtjen e Konsumatorit (KMK) ka konstatuar një “truk” të hollë të “Vodafone”, nëpërmjet të cilës kompania celulare ka mashtruar me mijëra abonentë të saj në Shqipëri.
Në muajt e fundit, kompania “Vodafone” ka zhvilluar një fushatë të gjerë publicitare në të gjithë formatet e medias, në të cilën reklamon se ofron “shpejtësi të lartë, ultra shpejtësi, pa asnjë vonesë, asnjë ngecje në rrjetin Gigabit Net duke përdorur sloganet si: “Rrjeti i parë Gigabit në Shqipëri”; “Luaj online sikur të jesh aty/Gigabit net”; “Gigagame me ultra shpejtësi”; “Teknologji Rapid V”.
Por, KMK, e cila ka zhvilluar një verifikim administrativ mbi këtë fushatë publicitare, ka konstatuar se kompania “Vodafone” ka paraqitur për publikun një informacion të “mangët dhe çorientues”.
Ky përfundim mbështetet në së pakun dy pika thelbësore.
Gjatë fushatës publicitare, kompania “Vodafone” prezanton se ka krijuar Rrjetin 1 gigabajt shpejtësi. Por, ky reklamin është tërësisht i pavërtetë, pasi kompania “Vodafone-Albania” nuk e ka mundësinë për të ofruar shërbimin e reklamuar.
Ky fakt konstatohet nga një shkresë që Autoriteti i Komunikimeve Elektronike dhe Postare (AKEP), i cili i konfirmon Komisionit për Mbrojtjen e Konsumatorit se, nga matjet e tij, por edhe të vetë “Vodafone Albania”, nuk është arritur shpejtësia 1 gigabajt përsekond (ose 1024 mbps).
Madje, AKEP shkon edhe më tej, kur deklaron se shpejtësia më e lartë që arrin Vodafone është 800 megabajt për second (mbps) dhe kjo vetëm në 47 stacione dhe jo në të gjithë territorin e Shqipërisë.
Përfaqësuesi i “Vodafone-Albania”, i paraqitur në seancën dëgjimore para Komisionerit për Konsumatorin ka pranuar se publiciteti është një formë për të treguar se kompania ka aftësinë për të ofruar këtë cilësi shërbimi.
Pra, “Vodafone” pranon se e ka teknologjinë për të arritur një shpejtësi të tillë, por që praktikisht nuk e ofron si shërbim për klientët e saj në Shqipëri. Në këtë mënyrë, kompania ka pranuar vetë se nuk e ofron shërbimin me shpejtësi 1 Giga, duke konfirmuar në këtë mënyrë mashtrimin e parë që ka realizuar me fushatën publicitare.
Gjithashtu, në të njëjtën fushatë publicitare, “Vodafone-Albania” krijon përshtypjen se rrjeti i saj 1 Gigabajt është për të gjithë klientët e tij. Por, ky perceptim i krijuar është tërësisht i gabuar. Shërbimi më cilësor i Vodafone (800 mbps) ofrohet vetëm në 4 pika në Tiranë dhe vetëm për ata klientë që kanë telefona të llojeve më të fundit (Samsung Gigabit S9 e S9+, Iphone XS dhe Iphone XR).
Në fakt, në reklamat e fushatës publicitare, “Vodafone” e ka vendosur një mesazh të tillë për kufizimin territorial të ofrimit të këtij shërbimi. Por, ky mesazh është i vështirë të dallohet, madje edhe nga ata me sy të sprovuar, në reklamat e “Vodafone”.
Këtë e ka konstatuar edhe Komisioneri për Mbrojtjen e Konsumatorit, i cili konstaton se, informacioni i përmendur në shënimet informuese, që shoqërojnë reklamën, jepet me shkronja shumë të vogla dhe transmetohet në ekran me shpejtësi, për një kohë shumë të shkurtër, vlerësuar kjo dhe në raport me kohëzgjatjen e gjithë reklamës.
“Përgjatë kohëzgjatjes së reklamës, e transmetuar në 60 sekonda, informacioni thelbësor për konsumatorin shfaqet vetëm 4 sekonda (rasti 1), dhe për reklamën me kohëzgjatje 105 sekonda, ky mesazh transmetohet për vetëm 3 sekonda (rasti 2)” shprehet Komisioni për Mbrojtjen e Konsumatorit.
Për këtë Komision, prezantimi i informacionit thelbësor, të shfaqur në mënyrën e sipërpërmendur, është i papërshtatshëm. “Shkronjat shumë të vogla, shpejtësia me të cilën shfaqet, vlerësuar, në raport me masën e informacionit të dhënë, dhe shfaqjes së sloganit kryesor “Rrjeti gigabit net” (shoqëruar dhe me mesazh zanor), bëjnë që informacioni i shfaqur të jetë i palexueshëm”, deklaron KMK, i cili thekson se kjo praktikë është në kundërshtim me ligjin “Për Mbrojtjen e Konsumatorit”.
Në përfundim të verifikimit të tij, Komisioni për Mbrojtjen e Konsumatorit, brenda kuadrit ligjor që zbaton, kërkon nga “Vodafone” që të ndreqë shkeljen ligjore.
https://www.youtube.com/watch?v=lqzdMEtSD4c&feature=youtu.be
