Si në çdo protestë, ambasada amerikane në Tiranë ka njoftuar shtetasit amerikanë të jenë vigjilentë, e nëse munden, të shmangin praninë e tyre në zonat e grumbullimit të turmave.
Në njoftimin që mban datën 14 shkurt, Ambasada njofton shtetasit amerikanë, e jo vetëm, të bëjnë kujdes veçanërisht në pikat e grumbullimit të njoftuara paraprakisht nga organizatorët e protestës, por pa u kufizuar vetëm në to, si Bulevardi “Dëshmorët e Kombit”, pranë Kryeministrisë; zona e kryqëzimit të “Zogut të Zi”; Qyteti Studenti dhe zona përreth stadiumit “Selman Stërmasi”.
“Një demonstrim pritet të zhvillohet më 16 shkurt 2019. Demonstruesit thuhet se do të mblidhen në zonën e Zogut të Zi, Qytet Studenti, Stadiumi Selman Stermasi dhe vende të tjera rreth qytetit në mëngjes, më pas do të shkojnë drejt Zyrës së Kryeministrit për t’u mbledhur rreth orës 11:00. Grupi synon të demonstrojë kundër qeverisë shqiptare. Kohëzgjatja e demonstratës është e panjohur”, thuhet në njoftimin e ambasadës.
