Tirana do të jetë e rrethuar nga uniformat blu ditën e nesërme, për shkak të protestës para kryeministrisë.
Burime për Boldnews, bëjnë me dije se në gatishmëri të plotë do të jenë rreth 1300 forca policie, përfshirë edhe forcat speciale RENEA dhe FNSH.
Gjithashtu burimet bëjnë me dije se rreth 900 forca policie do të jenë para kryeministrisë, ndërsa 400 të tjera do të jenë në anët e pasme dhe ato anësore. Ndërkohë burimi thekson se nesër nuk do të ketë asnjë police femër para kryeministrisë.
Shërbimi zjarrfikës dhe autoambulancat do qëndrojnë në gatishmëri pranë vendit ku do zhvillohet protesta. Ndërkohë që do bllokohen edhe një pjesë e akseve rrugore nga “Rruga e Elbasanit” në drejtim të Bulevardit “Dëshmorët e Kombit” e anasjelltas si dhe ato në drejtim të ish-bllokut dhe Tiranës së Re.
Autobusët me protestues nuk do lejohet të futen në qytet. Ata që do të vijnë nga veriu do të ndalojnë te Pallati i Sportit “Asllan Rusi”, ndërsa ata nga jugu dhe jug-lindja, te terminali i linjave interurbane te “Rruga e Elbasanit”.
Me qëllim mbarëvajtjen e protestës, Drejtoria e Përgjithshme e Policisë u ka dhënë urdhër komisariateve të policisë që efektivët të identifikojnë personat me rrezikshmëri që sipas uniformave blu do jenë në mesin e protestuesve. Në këtë funksion, do ketë kontrolle në segmente të caktuara rrugore në Tiranë.
