Gjatë ditës së sotme u zhvillua një tubim simbolik përballë Ministrisë së Financave nga Partia Agrare Ambientalistë ku të pranishëm ishin fermerët, grumbulluesit e fruta-perimeve, eksportues, tregtarë e shumicës, agropërpunues.
Arsyeja ishte ndryshimet ligjore të TVSH-së të produkteve bujqësore nga 20% në 6%.
Sipas tyre, ky ndryshim ka pasoja katastrofike për këtë sektor, sepse prish konkurrencën dhe falimenton tregtarët që zhvillojnë veprimtarinë e tyre brenda vendit. Çon drejt dështimit të agropërpunuesve të produkteve bujqësore (përpunuesit e qumështit, mishit, perimeve, ullirit, drithërave). Ul konkurrueshmërinë e produkteve vendase në raport me ato të rajonit, për pasojë edhe të ardhurat e fermerëve.
Në pankartat e tyre ata mbanin në duar Naim Frashërin me titullin e poezisë së tij “Bagëti e Bujqësi”. Gjithashtu përpara ministrisë hodhën mandarina.
