Nënkryetari i Partisë Demokratike Edi Paloka është shprehur se edhe gjatë seancës së kësaj të enjteje në parlament, kryeministri Edi Rama ka përdorur një fjalor fyes.
“Edhe sot shau se ju nuk e ndiqni çfarë flet ai aty i fshehur”, tha Paloka në një lidhje me video për emisionin “Opinion”.
Lidhur me spërkatjen e Ramës me bojë, Paloka deklaroi: “E bëra se doli në zërin e tij të zakonshëm”, duke ofenduar deputetët e opozitës.
Duke folur për protestën e 16 shkurtit, Paloka tha se ajo i është kërkuar PD-së nga njerëzit dhe se si do të zhvillohet, vetëm qytetarët e kanë në dorë. Paloka foli edhe për mosdhënien e lejes nga policia për të protestuar në dy rrugët anash kryeministrisë, duke u shprehur se qytetarët nuk i ndalon dot ministri i Brendshëm Lleshaj.
“Këto nuk vijnë se duam ne, s’kam nevojë për të bëjë unë show, se e kam kaluar unë fazën e përplasjeve të tilla, po mos të guxojë një palaço të tallet jo vetëm me Palokën, por dhe shqiptarët. Janë qytetarët që na kanë kërkuar ta organizojmë protestën me këmbënguljen e madhe. S’marrim leje nga policia, të marrim leje nga Rama? Kjo është absurde. Ne i kemi bërë procedurat, ata kanë kthyer përgjigje, por si ndalon dot as Leshi, as Lleshi qytetarët të protestojnë”, tha Paloka.
“Ka marrë fund politika, sepse politika zhvillohet në një vend normal”, shtoi ai.
“Si do shkojë protesta, sa do zgjasë, çdo gjë është në dorë të qytetarëve. Ne as i nxisim dhe as i ndalojmë, kur kemi një qeveri ilegjitime me vota të vjedhura, një kryeministër që bën rrugaçin, atëherë këta qytetarë që sot janë dhunuar, poshtëruar, paguajnë taksa të larta, kanë të drejtë të marrin në dorë situatën”, tha Paloka.
“Ne as i ndalojmë dhe as i nxisim qytetarët”, shtoi.
/Boldnews.al/
