Nga Boldnews.al
Pa iu larë ende boja në fytyrën dhe trupin e Edi Ramës, me një zell të pazakontë, Garda e Republikës dhe Policia e Shtetit dolën në reagim zyrtar dhe njoftuan nisjen e procedimit penal ndaj deputetit demokrat Edi Paloka, i cili në sallën e Parlamentit spërkati me bojë kryeministrin Edi Rama.
“Garda e Republikës me mbështetjen e strukturave të specializuara të Policisë së Shtetit ka nisur hetimet e menjëhershme për agresionin e kryer në sytë e të gjithëve dhe gjithashtu procedimin penal kundër shtetasit Edi Paloka”- thuhet në njoftim. Që në fjalinë e parë, dy strukturat që duhet të jenë të pavarura, bëjnë “hartim” duke u shprehur se “agresioni ka ndodhur në sytë e të gjithëve”…
Me mllefin e prishjes së imazhit dhe jo të dëmtimit të shefit të madh, Garda dhe Policia shkojnë më tej kur hetimet i nisin me paragjykim dhe dukshëm nën trysninë e atyre që kanë mbi kokë. Ata përcaktojnë ende pa dalë analizat se Paloka kishte solucion kimik të parapërgatitur. “Sot, në sallën e seancave të Kuvendit të Shqipërisë, deputeti Edi Paloka ka sulmuar me një solucion kimik të parapërgatitur Kryeministrin e Shqipërisë, z. Edi Rama”, përfundon reagimi i tyre.
Mbi çdo bazë standarde hetimore, fillimisht merren kampionë të materialeve që konsiderohen provë në çdo lloj sulmi apo tentative. Më pas, është laboratori shkencor dhe ekspertët të cilët arrijnë në përfundime mbi përmbajtjen e lëndës, në këtë rast të bojës. Por Garda dhe Policia e paracaktojnë çfarë mund të jetë ai spërkatës, që më shumë e ndoti kryeministrin sesa e sëkëlldisi në shëndet.
Rama nuk është aq pa njohuri porsa i përket kimikateve, pasi që në ditët e para të qeverisjes në vitin 2013 tentoi të sillte në Shqipëri amë kimike nga Siria për ti demontuar. Reagimi masiv qytetar e zbrapsën nga kjo ide, por po aq brilante mbi mënyrën si u trajtua çështja janë edhe qëndrimet e Erion Braçes, sot zëvendëskryeministër. Ai deklaroi se lënda kimike “Sarin” është e parrezikshme, madje me të mund të laje duart.
